နယူးယောက်၊ စက်တင်ဘာ ၂
ကမ္ဘာ့အပူချိန်သည် လာမည့်နှစ်အနည်းငယ်အတွင်း စက်မှုမထွန်းကားမီကာလထက် ၁.၅ ဒီဂရီဆဲလ်စီးယပ်စ်အထိ မြင့်တက်လာနိုင်ရာ ဘေးအန္တရာယ်များနှင့် ကျန်းမာရေးဆိုင်ရာ စိုးရိမ်ရမှုများကို ပိုမိုပြင်းထန်လာစေကြောင်း ကုလသမဂ္ဂ ပတ်ဝန်းကျင်ထိန်းသိမ်းရေးအစီအစဉ် (UNEP) ၏ ဗုဒ္ဓဟူးနေ့ကထုတ်ပြန်သည့် အစီရင်ခံစာတစ်စောင်တွင် ဖော်ပြထားသည်။
ရာသီဥတုပြောင်းလဲမှုကြောင့် ဖြစ်ပေါ်လာသော အကျိုးသက်ရောက်မှုများ၏ အန္တရာယ်များနှင့် သက်ရောက်မှုများကို လျှော့ချရန်အတွက် ရာစုနှစ်ကုန်တွင် အပူချိန်ကို ၁.၅ ဒီဂရီစင်တီဂရိတ် သို့မဟုတ် ၁.၅ ဒီဂရီစင်တီဂရိတ်အောက်သို့ ပြန်လည်ရောက်ရှိစေရန် အရေးကြီးကြောင်း အစီရင်ခံစာတွင် ဖော်ပြထားသည်။
ဂျပန်နိုင်ငံအပါအဝင် နိုင်ငံနှင့် ဒေသပေါင်း ၁၉၀ ခန့်က ကမ္ဘာ့အပူချိန်မြင့်တက်မှုကို ၁.၅ ဒီဂရီဆဲလ်စီးယပ်စ်အတွင်း ထိန်းချုပ်ထားရန် ရည်မှန်းချက်ချမှတ်ခဲ့သည့် နိုင်ငံတကာမူဘောင်တစ်ခုဖြစ်သော “ပါရီသဘောတူညီချက်” ကို ချုပ်ဆိုခဲ့ကြသည်မှာ လာမည့်နိုဝင်ဘာလတွင် ၁၀ နှစ်ပြည့်မြောက်တော့မည်ဖြစ်သည်။
“ဒီနွေရာသီရဲ့ ပူပြင်းတဲ့ အပူဒဏ်၊ ပြင်းထန်တဲ့ တောမီးလောင်ကျွမ်းမှုတွေနဲ့ အသက်ဆုံးရှုံးမှုများတဲ့ ရေကြီးရေလျှံမှုတွေက ရှေ့မှာဘာတွေဖြစ်လာမလဲဆိုတာကို သတိပေးချက်တစ်ခုပါပဲ။ ၁.၅ ဒီဂရီစင်တီဂရိတ်အထက် အပူချိန်မြင့်တက်မှုကို တတ်နိုင်သမျှလျော့ပါးပြီး တိုတောင်းအောင် ကျွန်တော်တို့လုပ်ရပါမယ်။ အဲဒါက ရည်မှန်းချက်တွေကို ကျော်လွန်ဖို့လို အပ်ပါတယ်” ဟု ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတာရက်စ်က ပြောကြားသည်။
လက်ရှိမူဝါဒများအရ ၂၁၀၀ ပြည့်နှစ်တွင် ကမ္ဘာကြီးပူနွေးလာမှု ပျမ်းမျှခန့်မှန်းချက်သည် ၂.၆ ဒီဂရီစင်တီဂရိတ်ခန့်အထိ ရောက်ရှိလိမ့်မည်ဟု အစီရင်ခံစာတွင် ဖော်ပြထားသည်။
ပါဝင်လက်မှတ်ရေးထိုးထားသည့် နိုင်ငံအားလုံးက ၎င်းတို့၏ ဖန်လုံအိမ်ဓာတ်ငွေ့လျှော့ချရေး ရည်မှန်းချက်များကို အပြည့်အဝအကောင်အထည်ဖော်ပြီး၊ ဖန်လုံအိမ်ဓာတ်ငွေ့ထုတ်လွှတ်မှုနှင့် သစ်တောများအပါအဝင် အခြားသော ဂေဟစနစ်များ၏ ပြန်လည်စုပ်ယူမှုပမာဏ မျှခြေဖြစ်စေကာ အသားတင်ထုတ်လွှတ်မှု သုညဖြစ်အောင် ဆောင်ရွက်နိုင်ခဲ့လျှင်ပင် ကမ္ဘာ့အပူချိန်သည် ၁.၈ ဒီဂရီဆဲလ် စီးယပ်စ်ခန့်အထိ မြင့်တက်လာဦးမည်ဟု ခန့်မှန်းရသည်။
အစီရင်ခံစာအရ အပူချိန်မြင့်တက်လာခြင်းသည် ပိုမိုပြင်းထန်သော ရာသီဥတု၊ ဂေဟစနစ်ဆုံးရှုံးမှုနှင့် ကျွန်းနိုင်ငံငယ်များ ရေနစ်မြုပ်ခြင်းကို ဖြစ်ပေါ်စေမည်ဖြစ်သည်။ ၎င်းတို့သည် လူ့ကျန်းမာရေး၊ အစားအစာဖူလုံရေး၊ ရေထောက်ပံ့မှုနှင့် အခြေခံအဆောက်အအုံများကိုလည်း ပြင်းထန်စွာထိခိုက်စေမည်ဖြစ်သည်။
ဤရာစုတွင် ကမ္ဘာ့အပူချိန် ၃ ဒီဂရီပူနွေးလာပါက ရေခဲမြစ်များသည် ၂၁၀၀ ပြည့်နှစ်တွင် ၎င်းတို့၏အလေးချိန်၏ လေးပုံတစ်ပုံကျော် ဆုံးရှုံးနိုင်ပြီး ပင်လယ်ရေမျက်နှာပြင်ကို ၉ စင်တီမီတာမှ ၁၃ စင်တီမီတာအထိ မြင့်တက်စေနိုင်သည်။
အစီရင်ခံစာတွင် ပါဝင်ရေးသားခဲ့သူ Exeter တက္ကသိုလ်မှ ရစ်ချက် ဘက်စ်က သြဂုတ်လက နီပေါနှင့် တရုတ်နိုင်ငံတို့တွင် ဖြစ်ပွားခဲ့သော ရုတ်တရက်ရေကြီးမှုကဲ့သို့သော ဖြစ်ရပ်များသည် အပူချိန်မြင့်တက်လာမှုကြောင့် ပိုမိုဖြစ်နိုင်ခြေရှိလာကြောင်း၊ “သို့သော် ထုတ်လွှတ်မှုများကို လျှော့ချခြင်းနှင့် ပူနွေးလာမှုပမာဏကို ကန့်သတ်ခြင်းဖြင့် ၎င်းတို့ကို ပိုမိုမဆိုးရွားလာစေရန် ကျွန်ုပ်တို့တားဆီးနိုင်သည်” ဟု ၎င်းက ပြောကြားသည်။
အစီရင်ခံစာတွင် ကမ္ဘာ့အပူချိန်သည် ၁.၅ ဒီဂရီဆဲလ်စီးယပ်စ်ထက် ကျော်လွန်မြင့်တက်သွားပါက ပြန်လည်လျှော့ချနိုင်ရန်အတွက် ကာဗွန်ဒိုင်အောက်ဆိုက် ပြန်လည်စုပ်ယူမှု သို့မ ဟုတ် ဖယ်ရှားမှုပမာဏသည် ထုတ်လွှတ်မှုပမာဏထက် ပိုမိုများပြားရမည်ဟု ဖော်ပြထားသော်လည်း ကာဗွန်ဒိုင်အောက်ဆိုက် ဖယ်ရှားခြင်းလုပ်ငန်းစဉ်ကို နောက်ထပ်ဖြည့်စွက်လုပ်ဆောင်ရမည့် နည်းလမ်းတစ်ခုအဖြစ်သာ သတ်မှတ်ထားသည်။
Ref: bangkokpost.com
ယနေ့ခေတ်
ကမ္ဘာ့အပူချိန်သည် နှစ်အနည်းငယ်အတွင်း ၁.၅ ဒီဂရီစင်တီဂရိတ်အထိ မြင့်တက်လာနိုင်ပြီး ဘေးအန္တရာယ်များအတွက်စိုးရိမ်ရ ဟုဆို အတွက် မှတ်ချက်များ 0 ခုရှိပါတယ်