ပါရီ၊ ဖေဖော်ဝါရီ ၁
အီရန်၏ ထိပ်တန်းလုံခြုံရေးအရာရှိက အမေရိကန်နှင့် ဆွေးနွေးမှုများတွင် တိုးတက်မှုရှိကြောင်း ပြောကြားခဲ့ပြီး အစ္စလာမ်သမ္မတနိုင်ငံ၏ တပ်မတော်အကြီးအကဲက စစ်ရေးတိုက် ခိုက်မှုများမပြုလုပ်ရန် စနေနေ့တွင် ဝါရှင်တန်အား သတိပေးခဲ့သည်။
အစိုးရဆန့်ကျင်ရေးဆန္ဒပြပွဲများအပေါ် အသက်ဆုံးရှုံးမှုများသော နှိမ်နင်းမှုအပြီးတွင် ဝင်ရောက်စွက်ဖက်မည်ဟု ထရမ့်ကခြိမ်းခြောက်ပြီးနောက် ဝါရှင်တန်က USS Abraham Lincoln လေယာဉ်တင်သင်္ဘောဦးဆောင်သော ရေတပ်တိုက်ခိုက်ရေးအဖွဲ့ကို အီရန်ကမ်းရိုးတန်းသို့ စေလွှတ်ခဲ့သည်။
သင်္ဘောအုပ်စု ရောက်ရှိလာခြင်းကြောင့် အီရန်နှင့် ထိပ်တိုက်ရင်ဆိုင်ရမည်ကို စိုးရိမ်မှုများ မြင့်တက်လာခဲ့ပြီး တိုက်ခိုက်မှုတစ်ခုဖြစ်ပွားပါက အမေရိကန်အခြေစိုက်စခန်းများ၊ သင်္ဘောများနှင့် မဟာမိတ်များ (အထူးသဖြင့် အစ္စရေး) ကို ဒုံးကျည်ဖြင့်တုံ့ပြန်မည်ဟု အီရန်က သတိပေးခဲ့သည်။
သို့သော် အီရန်သည် အမေရိကန်၏ စစ်ရေးအရအရေးယူမှုကို ရင်ဆိုင်မည့်အစား ၎င်း၏နျူကလီးယားနှင့် ဒုံးကျည်အစီအစဉ်များနှင့်ပတ်သက်၍ သဘောတူညီချက်တစ်ရပ်ကို ချုပ်ဆိုလိုလိမ့်မည်ဟုယုံကြည်ကြောင်း ထရမ့်က ပြောကြားခဲ့ပြီး၊ တီဟီရန်ကလည်း ၎င်း၏ဒုံးကျည်များနှင့် ကာကွယ်ရေးစွမ်းရည်များသည် ဆွေးနွေးပွဲအစီအစဉ်တွင် မပါဝင်ပါက နျူကလီးယားဆွေးနွေးပွဲများအတွက် အသင့်ရှိနေကြောင်း ပြောကြားခဲ့သည်။
ရုရှားသမ္မတ ဗလာဒီမာပူတင်နှင့် မော်စကိုတွင် ဆွေးနွေးမှုများပြုလုပ်ခဲ့သည်ဟု ကရင်မလင်က ပြောကြားပြီး နောက်တစ်ရက်အကြာတွင် အီရန်၏အမြင့်ဆုံး အမျိုးသားလုံခြုံရေးကောင်စီအကြီးအကဲ အလီလာရီဂျာနီက “ လုပ်ကြံဖန်တီးထားတဲ့ မီဒီယာစစ်ပွဲရဲ့ လှုံ့ဆော်မှုနဲ့ ဆန့်ကျင်ဘက်အနေနဲ့ ဆွေးနွေးပွဲတွေအတွက် ဖွဲ့စည်းပုံဆိုင်ရာအစီအစဉ်တွေ တိုးတက်နေပါတယ်” ဟု ပြောကြားသည်။
အီရန်စစ်တပ်အကြီးအကဲ အမီယာဟာတာမီက အမေရိကန်နဲ့ အစ္စရေးကို တိုက်ခိုက်မှုများမလုပ်ရန် အစောပိုင်းက သတိပေးခဲ့ပြီး သူ့၏တပ်ဖွဲ့များသည် “ ခုခံကာကွယ်မှုနဲ့ စစ်ရေးအရ အသင့်ဖြစ်နေ” သည်ဟု ပြောကြားခဲ့သည်။
“ ရန်သူက အမှားလုပ်မိရင် သူ့ရဲ့ကိုယ်ပိုင်လုံခြုံရေး၊ ဒေသရဲ့လုံခြုံရေးနဲ့ ဇီယွန်နစ်အစိုးရရဲ့လုံခြုံရေးကို သံသယဖြစ်စရာမလိုပါဘူး” ဟု ဟာတာမီက တရားဝင်သတင်းဌာန IRNA ကို ပြောကြားသည်။
အီရန်ရဲ့ နျူကလီးယားနည်းပညာနဲ့ ကျွမ်းကျင်မှုကို “ ဖယ်ရှားပစ်လို့ မရပါဘူး” ဟု သူကပြောသည်။
တင်းမာမှုများ မြင့်တက်လာသည်နှင့်အမျှ စနေနေ့က ဖြစ်ရပ်အတော်များများသည် တိုက်ခိုက်မှု သို့မဟုတ် ဖျက်ဆီးမှုများနှင့် ဆက်စပ်နေသည်ကို ငြင်းဆိုရန် အီရန်အာဏာပိုင်များသည် အလျင်စလို လုပ်ဆောင်ခဲ့ကြသည်။ အဆိုပါဖြစ်ရပ်များတွင် အီရန်တောင်ပိုင်းဆိပ်ကမ်းမြို့ ဘန်ဒါအဘတ်စ်တွင် ဖြစ်ပွားခဲ့သည့် ပေါက်ကွဲမှုတစ်ခုလည်းပါဝင်သည်။ ဒေသခံမီးသတ်သမားများက ဓာတ်ငွေ့ယိုစိမ့်မှုကြောင့်ဖြစ်သည်ဟု ဆိုသည်။
အစ္စလာမ်မစ်တော်လှန်ရေးအစောင့်တပ် (IRGC) က ၎င်း၏ရေတပ်တပ်ဖွဲ့များပိုင် အဆောက်အအုံများအား ပစ်မှတ်ထားခဲ့သည်ကို ငြင်းဆိုခဲ့ကြောင်း Fars သတင်းဌာနက ဖော်ပြခဲ့သည်။
Tasnim အေဂျင်စီကလည်း စနေနေ့တွင် အစောင့်တပ်၏ ရေတပ်မှူး Alireza Tangsiri နှင့်ပတ်သက်သည့် “ လုပ်ကြံမှု ကောလာဟလများ” ကိုလည်း ငြင်းဆိုခဲ့သည်။
‘ကိုယ်ပိုင်နယ်မြေ’
သောကြာနေ့တွင် အမေရိကန်ဗဟိုကွပ်ကဲမှု (CENTCOM) က IRGC သည် ကမ္ဘာလုံးဆိုင်ရာ စွမ်းအင်ထောက်ပံ့မှုအတွက် အဓိကသယ်ယူပို့ဆောင်ရေးဗဟိုချက်ဖြစ်သော ဟောမို့ဇ်ရေလက်ကြားတွင် “ နှစ်ရက်ကြာ တိုက်ရိုက်ပစ်ခတ်သည့် ရေတပ်လေ့ကျင့်ခန်း” ကို ပြုလုပ်မည်ဟု ပြောကြားခဲ့သည်။
ကြေညာချက်တစ်ခုတွင် CENTCOM က “ အမေရိကန်တပ်ဖွဲ့များအနီးတွင် မလုံခြုံသော၊ ပရော်ဖက်ရှင်နယ်မဆန်သော အပြုအမူများ” နှင့်ပတ်သက်ပြီး IRGC အား သတိပေးခဲ့သည်။
အဆိုပါသတိပေးချက်နှင့်ပတ်သက်ပြီး “ ကျွန်ုပ်တို့၏ကမ်းရိုးတန်းပြင်ပတွင် လှုပ်ရှားနေသော အမေရိကန်စစ်တပ်က ကျွန်ုပ်တို့၏ အစွမ်းထက်သော လက်နက်ကိုင်တပ်ဖွဲ့များ ကျွန်ုပ်တို့၏ကိုယ်ပိုင်နယ်မြေတွင် ပစ်မှတ်ထားလေ့ကျင့်မှုကို မည်သို့ပြုလုပ်သင့်ကြောင်း အမိန့်ပေးရန် ကြိုးစားနေသည်” ဟု အီရန်နိုင်ငံခြားရေးဝန်ကြီး Abbas Araghchi က X တွင် ရေးသားခဲ့သည်။
Ref: bangkokpost.com
ဓာတ်ပုံ – အမျိုးသားလုံခြုံရေးကောင်စီအကြီးအကဲ အလီလာရီဂျာနီ
#ယနေ့ခေတ်
အမေရိကန်နှင့် ဆွေးနွေးမှုများတွင် တိုးတက်မှုရှိကြောင်း အီရန် ပြောကြား အတွက် မှတ်ချက်များ 0 ခုရှိပါတယ်