ရန်ကုန်၊ မတ် ၄
ကချင်ပြည်နယ်၊ မြစ်ကြီးနားခရိုင်ရှိ “ပညာအလင်းတန်း” ပုဂ္ဂလိကစာကျက်ဝိုင်းမှအဆောင်တစ်ခု ဝါယာရှော့ဖြစ်ရာမှတဆင့် မီးလောင်မှုဖြစ်ပွားခဲ့ကြောင်း သိရသည်။
မေ ၃ ရက်၊ ည ၇ နာရီကျော်က မြစ်ကြီးနားမြို့၊ နယ်မြေ(၇)၊ ခေမာသီရီရပ်ကွက်၊ ခေမာသီရီလမ်းသွယ်(၂၁)လမ်းတွင်ဖွင့်လှစ်ထားသည့် “ပညာအလင်းတန်း”ပုဂ္ဂလိကစာကျက်ဝိုင်းမှ အဆောင်တစ်ခုတွင် TV မှသွယ်တန်းထားသည့် လျှပ်စစ်ခလုတ်ခုံမှတဆင့် ဝါယာရှော့ဖြစ်ရာက မီးလောင်မှုဖြစ်ပွားခဲ့ကြောင်း သိရသည်။
“မီးလောင်တာက TV မှာသွယ်တန်းထားတဲ့မိန်းခုံကနေ ဝါယာရှော့ဖြစ်ပြီးတော့လောင်တာပါ။ ကျောင်းက ပညာသင်တဲ့ကျောင်းတော့မဟုတ်ဘူး။ စာကျက်ဝိုင်းဖွင့်ထားတဲ့အဆောင်ပါ။ ကလေးတွေက လွတ်ရာလွတ်ကြောင်းတော့သွားကြပါတယ်။ အန္တရာယ်လည်းကင်းပါတယ်။ လူထိခိုက်မှုတော့မရှိပါဘူး။ ဆုံးရှုံးမှုတန်ဖိုးကတော့ သိန်းသုံးဆယ်လောက်တော့ရှိပါတယ်။” ဟု နယ်မြေခံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
မီးလောင်မှုသည် ည ၇ နာရီ၊ ၂၃ မိနစ်တွင် စတင်လောင်ကျွမ်းခဲ့ပြီး၊ ည ၇ နာရီ၊ ၅၉ မိနစ်တွင်မီးထိန်းနိုင်ခဲ့သည်။ အဆိုပါမီးလောင်ကျွမ်းမှုကို နယ်မြေခံမီးသတ်တပ်ဖွဲ့နှင့် ဒေသခံလူမှုကူညီရေးအသင်းများက ဝိုင်းဝန်းမီးငြိမ်းသတ်ခဲ့ကြောင်း သိရသည်။
#ချစ်ချစ်ခိုင်
ဓာတ်ပုံ-MFSD
#ယနေ့ခေတ်
မြစ်ကြီးနားတွင် ပုဂ္ဂလိကစာကျက်ဝိုင်းမှအဆောင်တစ်ခု မီးလောင်မှုဖြစ်ပွား အတွက် မှတ်ချက်များ 0 ခုရှိပါတယ်