တိုကျို၊ ဇူလိုင် ၂၈
ဂျပန်နိုင်ငံ အနောက်တောင်ပိုင်းတွင် ပြင်းအား ၇.၁ ရှိသော ငလျင်တစ်ခု လှုပ်ခတ်ခဲ့ပြီး လူအများအပြား ဒဏ်ရာရရှိခဲ့သည်။ ဆူနာမီသတိပေးချက်ကို တစ်နာရီအတွင်း ပြန်လည်ရုပ်သိမ်းခဲ့သည်။
ဒေသစံတော်ချိန် ညနေ ၄ နာရီ ၂၇ မိနစ်က ကျူရှူးကျွန်း၏ ကုန်းတွင်းပိုင်းတွင် လှုပ်ခတ်ခဲ့သော ငလျင်အပြီးတွင် လူပေါင်း ၁၅၀,၀၀၀ ကျော်ကို ဘေးလွတ်ရာသို့ ပြောင်းရွှေ့ရန် တောင်းဆိုထားသည်။
ငလျင်ဗဟိုချက်မှာ ၁၀ ကီလိုမီတာအကွာတွင် တည်ရှိသောကြောင့် မိုးလေဝသအေဂျင်စီက နောက်ဆက်တွဲငလျင်များ ပြင်းထန်စွာလှုပ်ခတ်နိုင်ကြောင်း သတိပေးထားသည်။ အ မျိုးသားရုပ်သံ NHK မှ ထုတ်လွှင့်သော ရုပ်သံမှတ်တမ်းတွင် လမ်းများနှင့် တံတားများ အက်ကွဲနေပြီး အဆောက်အအုံများစွာ မီးလောင်နေသည်ကို တွေ့မြင်ရသည်။
ပစိဖိတ်မီးကွင်းပေါ်တွင် တည်ရှိသော ဂျပန်နိုင်ငံသည် ကမ္ဘာပေါ်တွင် ငလျင်လှုပ်ခတ်မှု အများဆုံးဖြစ်ပွားသည့် နိုင်ငံများထဲမှ တစ်ခုဖြစ်သည်။ တစ်နှစ်လျှင် ငလျင် ၁၅၀၀ ခန့် လှုပ်ခတ်လေ့ရှိသည်။
“ဒဏ်ရာရရှိမှုများနှင့် ပိုင်ဆိုင်မှုပျက်စီးဆုံးရှုံးမှုပမာဏကို ကျွန်ုပ်တို့ အကဲဖြတ်နေဆဲဖြစ်သော်လည်း ဒဏ်ရာရသူ အများအပြားရှိနှင့်ပြီးဖြစ်ကြောင်း ကျွန်ုပ်အား အသိပေးအကြောင်းကြားထားပြီးဖြစ်သည်” ဟု ဝန်ကြီးချုပ် ဆာနေး တကိုင်ချိက အင်္ဂါနေ့တွင် ပြောကြားသည်။
ဒဏ်ရာရသူ ၁၀ ဦးခန့်သည် သက်ကြီးရွယ်အိုစောင့်ရှောက်ရေးဂေဟာတွင်ရှိနေပြီး အနည်းဆုံး လူ ၅၀ ကို ဆေးရုံတွင်ကုသပေးနေကြောင်း ဂျပန်ရုပ်သံ NHK ၏အဆိုအရ သိရသည်။
ရထားဝန်ဆောင်မှုများကို ရပ်ဆိုင်းထားပြီး အိမ်ခြေထောင်ပေါင်းများစွာအတွက် လျှပ်စစ်ဓာတ်အား ဖြတ်တောက်ထားသည်။
ဂျပန်၏ ကိုယ်ပိုင်ကာကွယ်ရေးတပ်ဖွဲ့၊ မီးသတ်တပ်ဖွဲ့နှင့် ကမ်းခြေစောင့်တပ် အပါအဝင် ရှေးဦးတုံ့ပြန်သူများကို စေလွှတ်ထားကြောင်း အစိုးရအဖွဲ့အတွင်းရေးမှူးချုပ် မီနိုရူ ကီဟာရာက ပြောကြားသည်။
“ငလျင်လှုပ်ခတ်မှု အထူးပြင်းထန်သော ဒေသများရှိ ဒေသခံများအနေဖြင့် ရေဒီယို၊ ရုပ်မြင်သံကြားနှင့် အင်တာနက်မှတစ်ဆင့်ထုတ်ပြန်သော ဘေးလွတ်ရာသို့ ရွှေ့ပြောင်းရေးဆိုင် ရာ အချက်အလက်များကို အနီးကပ်အာရုံစိုက်ရန်နှင့် တည်ငြိမ်စွာလုပ်ဆောင်ရန် ကျွန်ုပ်တို့တိုက်တွန်းပါသည်” ဟု ၎င်းက ပြောကြားသည်။
ပြီးခဲ့သည့် ဒီဇင်ဘာလက ဂျပန်နိုင်ငံ အရှေ့မြောက်ပိုင်းတွင် ရစ်ချ်တာစကေး ၇.၅ ရှိသော ငလျင်တစ်ခု လှုပ်ခတ်ခဲ့ရာ လူ ၃၀ ဒဏ်ရာရရှိခဲ့သည်။
၂၀၁၁ ခုနှစ် မတ်လတွင် နိုင်ငံအရှေ့ပိုင်းတွင် ရစ်ချ်တာစကေး ၉ ရှိသော ငလျင်တစ်ခု လှုပ်ခတ်ခဲ့ပြီး လူပေါင်း ၁၈,၀၀၀ သေဆုံးခဲ့သည့် ကြီးမားသော ဆူနာမီလှိုင်းတစ်ခု ဖြစ်ပေါ်ခဲ့သည်။
Ref: bbc.com
ယနေ့ခေတ်
ဂျပန်နိုင်ငံတွင် ပြင်းအား ၇.၁ ရှိသော ငလျင်လှုပ်ခတ် အများအပြား ဒဏ်ရာရ အတွက် မှတ်ချက်များ 0 ခုရှိပါတယ်