ဆူဗား၊ ဩဂုတ် ၇
ဖီဂျီတွင်စုဝေးနေသော ပစိဖိတ်သံတမန်များသည် သောကြာနေ့တွင် ဒေသတွင်း၌ တရုတ်၏ဒုံးကျည်စမ်းသပ်မှုကို ရှုတ်ချသည့် ပူးတွဲကြေညာချက်တစ်ရပ်ကို သဘောတူညီမှုမရခဲ့ဘဲ နယူးဇီလန်နိုင်ငံခြားရေးဝန်ကြီးက ၎င်းတို့သည် “အပြင်လူများ” ကို ကျေနပ်အောင်ပြုလုပ်နေသည်ဟု စွပ်စွဲခဲ့သည်။
ပေကျင်းသည် ပြီးခဲ့သည့်လက တိုက်ကြီးဖြတ်ကျော် ဒုံးကျည်စမ်းသပ်မှုမပြုလုပ်မီ နိုင်ငံအနည်းငယ်ကိုသာ အချိန်တိုအတွင်း အသိပေးခဲ့ပြီး ၎င်း၏လက်လှမ်းမီမှုကို တိုးချဲ့ရန် ကြာမြင့်စွာရှာဖွေနေသောဒေသတွင် ၎င်း၏စစ်ရေးအင်အားကို ပြသခဲ့သည်။
ဒုံးပျံသည် ဆော်လမွန်ကျွန်းစု၊ နော်ရူးနှင့် တူဗာလူကြားရှိ သမုဒ္ဒရာတစ်နေရာတွင် ကျရောက်ခဲ့ပုံရကြောင်း စောင့်ကြည့်သူများက ပြောကြားသည်။
၎င်းသည် ပစိဖိတ်ခေါင်းဆောင်များစွာထံမှ ရှုတ်ချမှုများကို ဖြစ်ပေါ်စေခဲ့သော်လည်း အဖွဲ့ဝင် ၁၈ ဦးပါ ပစိဖိတ်ကျွန်းစုဖိုရမ်သည် စမ်းသပ်မှုအပေါ် တရားဝင်တုံ့ပြန်မှု မထုတ်ပြန်ရသေးပါ။
နယူးဇီလန်၏ ပွင့်လင်းသော နိုင်ငံခြားရေးဝန်ကြီး ဝင်စတန်ပီတာစ်က နာရီပေါင်းများစွာကြာ အစည်းအဝေးအပြီးတွင် အဖွဲ့သည် ပစ်လွှတ်မှုကိုရှုတ်ချသည့် ပူးတွဲကြေညာချက်တစ်ရပ်ကို သဘောတူညီမှုမရခဲ့ကြောင်း ပြောကြားခဲ့သည်။
သူက ကြေညာချက်ကို ပိတ်ဆို့ခဲ့သည့် အဖွဲ့ဝင်နိုင်ငံနှစ်ခု၏အမည်ကို မပြောခဲ့သော်လည်း တရုတ်နှင့်ခင်မင်ရင်းနှီးသည့် ကီရီဘာတီနှင့် နော်ရူးနိုင်ငံများသည် ၎င်းတို့၏ အဓိကမိတ်ဖက်နိုင်ငံတစ်ခုကို တရားဝင်ဝေဖန်ရန် စိတ်ဝင်စားမှုနည်းပါးခဲ့သည်ဟု ယူဆရသည်။
“သူတို့က သူတို့ရဲ့ သဘောထားကွဲလွဲမှုတွေကလွဲလို့ အကြောင်းပြချက်တွေကို တကယ်တမ်း မဖော်ပြခဲ့ကြဘူး” ဟု ပီတာက သတင်းထောက်များကို ပြောသည်။
“ပစိဖိတ်ကျွန်းစုဖိုရမ်ရဲ့ ဆန္ဒတွေထက် ပြင်ပမိတ်ဖက်တွေရဲ့ဆန္ဒတွေကို ဖြည့်ဆည်းပေးနေတယ်” ဟု ၎င်းက စွပ်စွဲခဲ့သည်။
“အပြင်လူတွေက ဒီမှာရှိနေခဲ့တဲ့ ကျွန်တော်တို့ ထောင်ပေါင်းများစွာ အတွင်းလူတွေကို ကျွန်တော်တို့ရဲ့ ရပ်တည်ချက်က ဘယ်လိုဖြစ်သင့်လဲဆိုတာ ပြောပြသင့်တယ်လို့ မထင်ဘူးလားဆိုတာ ကျွန်တော်တို့ ရှင်းရှင်းလင်းလင်း ပြောခဲ့ပါတယ်” ဟု တရုတ်ကို သွယ်ဝိုက်ပြီးတုံ့ပြန်သည့်အနေနှင့် ၎င်းက ထပ်လောင်းပြောကြားသည်။
ထိုင်ဝမ်၏ သံတမန်ရေး မဟာမိတ်ဖြစ်သည့် တူဗာလူကလည်း ပူးတွဲကြေညာချက်ထုတ်ပြန်ရန် တောင်းဆိုခဲ့ပြီး စမ်းသပ်မှုမတိုင်ခင် ကြိုတင်အကြောင်းကြားစာ မရရှိခဲ့ကြောင်း ပြောကြားသည်။
“ကျွန်တော်တို့ဟာ ဘယ်အင်အားကြီးနိုင်ငံရဲ့ ခြိမ်းခြောက်မှုကိုမှ မလိုချင်ပါဘူး” ဟု တူဗာလူနိုင်ငံခြားရေး၊ အလုပ်သမားနှင့် ကုန်သွယ်ရေးဆိုင်ရာ အမြဲတမ်းအတွင်းရေးမှူး ပါဆူနာ တွားဂါက ဆွေးနွေးပွဲပြင်ပတွင် ပြောကြားသည်။
“အဲဒီလို ဆက်ဆံခံရစေချင်တဲ့ ပုံစံမျိုး မဟုတ်ပါဘူး” ဟု ၎င်းက ပြောသည်။
“ဒါကြောင့် ပစိဖိတ်ဒေသကနေ အပြန်အလှန်ထုတ်ပြန်ချက်တစ်ခု ပေးပို့ချင်ပါတယ်၊ ဘာလို့လဲဆိုတော့ အဲဒါက ကျွန်တော်တို့ရဲ့ ရပ်တည်ချက်ကို ခိုင်မာစေမှာမို့လို့ပါ။” ဟု ဆိုသည်။
ဒုံးကျည်သည် တူဗာလူနှင့် “အလွန်နီးကပ်သည့်နေရာတွင်” ကျရောက်ခဲ့ပြီး အမေရိကန်၊ တရုတ်အပါအဝင် အင်အားကြီးနိုင်ငံများထံ အတုအယောင်ဒုံးကျည်ထိပ်ဖူးကို ရှာဖွေရေး အကူအညီတောင်းခံခဲ့ကြောင်း တူဂါက ဆိုသည်။
သြစတြေးလျနိုင်ငံခြားရေးဝန်ကြီး ပန်နီဝေါင်က တရုတ်နိုင်ငံက စမ်းသပ်မှုနှင့်ပတ်သက်ပြီး ပစိဖိတ်ဒေသကနေ “အလွန်ရှင်းလင်းတဲ့ တုံ့ပြန်မှု” ကို သတိပြုမိမည်ဟု မျှော်လင့်ကြောင်း အစည်းအဝေးမတိုင်မီ ပြောကြားခဲ့သည်။
“ပစိဖိတ်ကျွန်းစုဖိုရမ်ရဲ့ အများစုက တရုတ်ရဲ့ ပဲ့ထိန်းဒုံးကျည်စမ်းသပ်မှုအပေါ် စိုးရိမ်ပူပန်မှုတွေကို ဖော်ပြခဲ့ကြပါတယ်” ဟု သူမက ပြောသည်။
ဖီဂျီနိုင်ငံမြို့တော် ဆူဗာတွင် သောကြာနေ့ကကျင်းပသည့် အစည်းအဝေးသည် စက်တင်ဘာလ ပလောင်းတွင်ကျင်းပမည့် ခေါင်းဆောင်များ၏ အစည်းအဝေးမတိုင်မီ ကျင်းပခဲ့ခြင်းဖြစ်သည်။
ဖိလစ်ပိုင်အနောက်ဘက် ကီလိုမီတာ ၈၀၀ ဝန်းကျင်တွင်ရှိသော ကျွန်းရာပေါင်းများစွာပါဝင်သည့် ပလောင်းကျွန်းစုသည် ထိုင်ဝမ်နှင့် သံတမန်ဆက်ဆံရေးရှိသည့် နိုင်ငံများတွင် ပါဝင်သည်။
သံတမန်များသည် မည်သည့်အဓိကမိတ်ဖက်များကို ထိုအစည်းအဝေးသို့ တက်ရောက်ခွင့်ပြုသင့်သည်ကို သောကြာနေ့တွင်ဆွေးနွေးရန် မျှော်လင့်ထားသည်။
ပြီးခဲ့သည့်နှစ်က ဆော်လမွန်ကျွန်းစုသည် ထိုင်ဝမ်ကိုချန်လှပ်ထားရန် တရုတ်ကတောင်းဆိုမှုကို တုံ့ပြန်သည့်အနေဖြင့် ဟိုနီယာရာတွင်ကျင်းပသော ခေါင်းဆောင်များအစည်းအဝေးသို့ မိတ်ဖက်နိုင်ငံအားလုံးကို တက်ရောက်ခွင့် ပိတ်ပင်ခဲ့သည်။
Ref: bangkokpost.com
ယနေ့ခေတ်
တရုတ်ဒုံးကျည်စမ်းသပ်မှုကို ရှုတ်ချသည့်ကြေညာချက်အတွက် ပစိဖိတ်နိုင်ငံများ သဘောတူညီမှုမရ အတွက် မှတ်ချက်များ 0 ခုရှိပါတယ်