ဘန်ကောက်၊ ဖေဖော်ဝါရီ ၂၆
ပြီးခဲ့သည့်ရွေးကောက်ပွဲတွင် ဒုတိယနေရာရရှိခဲ့သော ထိုင်းနိုင်ငံရေးပါတီတစ်ခုသည် ရွေးကောက်ပွဲကော်မရှင်အရာရှိများကို ရွေးကောက်ပွဲဥပဒေများ ချိုးဖောက်သည်ဟုစွပ်စွဲကာ ရာဇဝတ်မှုဖြင့် တရားစွဲဆိုခဲ့ကြောင်း ပါတီ၏ ဒုတိယဥက္ကဋ္ဌက AFP သို့ ပြောကြားသည်။
ပြုပြင်ပြောင်းလဲရေးလိုလားသည့် ပြည်သူ့ပါတီသည် ရွေးကောက်ပွဲကော်မရှင်မှ အရာရှိခုနစ်ဦးကို ရာဇဝတ်မှုဖြင့် တရားစွဲဆိုခဲ့ကြောင်း ရွေးကောက်ပွဲကော်မရှင်၏ အထွေထွေအ တွင်းရေးမှူးချုပ်နှင့် ရွေးကောက်ပွဲအရာရှိတစ်ဦးဖြစ်သူ ဒုတိယဥက္ကဋ္ဌ ဝါရို အဆာဝါရမ်ဂရူရမ်က ပြောကြားသည်။
“ စွဲချက်နှစ်ခုတွင် တာဝန်ဝတ္တရားများကို မှားယွင်းစွာထမ်းဆောင်ခြင်းနှင့် ဆက်စပ်နေပြီး ကျွန်ုပ်တို့တောင်းဆိုသော နောက်ဆုံးစွဲချက်မှာ မဲများကိုခြေရာခံနိုင်ပြီး လျှို့ဝှက်ထားသင့်သည့်အတိုင်း မသိမ်းဆည်းဘဲ QR ကုဒ်များ၊ ဘားကုဒ်များဖြင့် မဲများကိုမှတ်သားခြင်းနှင့်ပတ်သက်သည်” ဟု ဝါရိုက ပြောကြားသည်။
ရွေးကောက်ပွဲကော်မရှင်သည် ယာယီဝန်ကြီးချုပ် အနုတင်ချန်ဝီရာကူးလ်၏ ကွန်ဆာဗေးတစ်ပါတီ ဖွန်ကျိုင်ထိုင်းပါတီ၏အောင်ပွဲကို ဗုဒ္ဓဟူးနေ့တွင် အတည်ပြုခဲ့သည်။
ဖွန်ကျိုင်ထိုင်းပါတီသည် မဲဆန္ဒနယ် ၁၇၀ တွင် အနိုင်ရခဲ့ပြီး၊ မဲအများဆုံးရရှိခဲ့သည်။ ရွေးကောက်ပွဲမတိုင်မီ စစ်တမ်းများတွင် ပထမနေရာရရှိခဲ့သော ပြည်သူ့ပါတီသည် မဲဆန္ဒနယ် ၈၈ ခုဖြင့် ဒုတိယနေရာတွင်သာရပ်တည်ခဲ့ကြောင်း ကော်မရှင်က ထုတ်ပြန်ခဲ့သည်။
ရွေးကောက်ပွဲနေ့အပြီးတွင် နိုင်ငံသားအချို့နှင့် ကျွမ်းကျင်သူများက မဲစာရွက်များတွင်တွေ့ရှိရသော QR ကုဒ်များ၊ ဘားကုဒ်များကို မဲဆန္ဒရှင်တစ်ဦးချင်းကို ခွဲခြားသတ်မှတ်ရန် အသုံးပြုနိုင်မည်ကို စိုးရိမ်မှုများပေါ်ပေါက်ခဲ့သည်။
သို့သော် ကော်မရှင်က အမှတ်အသားများသည် ရွေးကောက်ပွဲလုံခြုံရေးကို သေချာစေရန်နှင့် မဲစာရွက်အတုများအသုံးပြုခြင်းကို ကာကွယ်ရန်ဖြစ်ကြောင်း ပြောကြားခဲ့သည်။
ဝါရို၏အဆိုအရ အဂတိလိုက်စားမှုနှင့် အကျင့်ပျက်ခြစားမှုဆိုင်ရာ ရာဇဝတ်မှုဆိုင်ရာတရားရုံးက မတ်လ ၂၄ ရက်နေ့တွင် အမှုကိုကြားနာရန် ဆုံးဖြတ်မည်ဟု ပြောကြားသည်။
တရားရုံးက အမှုကိုလက်ခံပါက စွပ်စွဲခံရသူကိုးဦးသည် အများဆုံး ထောင်ဒဏ် ၂၀ နှစ်နှင့် ၎င်းတို့၏ နိုင်ငံရေးအခွင့်အရေးများကို ဆယ်စုနှစ်တစ်ခုကြာ ဆုံးရှုံးရမည်ဖြစ်သည်။
Ref: channelnewsasia.com
#ယနေ့ခေတ်
ထိုင်းရွေးကောက်ပွဲတွင် ဒုတိယနေရာရခဲ့သည့်ပါတီက ရွေးကောက်ပွဲအရာရှိများကို ရာဇဝတ်မှုဖြင့် တရားစွဲဆို အတွက် မှတ်ချက်များ 0 ခုရှိပါတယ်