အစ္စလာမ်မာဘတ်၊ ဩဂုတ် ၂၆
ပါကစ္စတန်နိုင်ငံ မြို့တော်ရှိ အစိုးရဆေးရုံတစ်ခုမှ မွေးကင်းစကလေးငယ်များထားရှိသည့် ကလေးထိန်းဌာနတွင် ဗုဒ္ဓဟူးနေ့အစောပိုင်းတွင် မီးလောင်မှုဖြစ်ပွားခဲ့ပြီး ကလေးငယ် ၁၄ ဦး သေဆုံးခဲ့ကြောင်း ဆေးရုံအရာရှိများနှင့် အစိုးရ၏ပြောကြားချက်အရ သိရသည်။
မီးလောင်မှုဖြစ်ပွားချိန်တွင် ပါကစ္စတန် ဆေးသိပ္ပံအင်စတီကျုရှိ ကလေးထိန်းဌာနတွင် အနည်းဆုံး မွေးကင်းစကလေးငယ် ၁၅ ဦးကို ထားရှိကြောင်း ဆေးရုံတာဝန်ရှိသူများက ပြောကြားသည်။ ကလေးငယ်တစ်ဦးကို ကယ်တင်နိုင်ခဲ့သည်။
ကယ်ဆယ်ရေးအရာရှိများက မီးလောင်မှုသည် နံနက် ၆:၄၅ နာရီခန့်တွင်စတင်ခဲ့ပြီး ဆေးရုံမှ မီးယပ်အထူးကုဌာန၏ အစိတ်အပိုင်းတစ်ခုဖြစ်သည့် ကလေးထိန်းဌာနအတွင်း အဲယားကွန်းယူနစ်၏ ကွန်ပရက်ဆာပေါက်ကွဲပြီး ဖြစ်ပွားခဲ့ခြင်းဖြစ်သည်ဟု ပြောကြားသည်။ မီးသတ်သမားများသည် လျင်မြန်စွာမီးငြှိမ်းသတ်နိုင်ခဲ့ပြီး ကယ်ဆယ်ရေးအဖွဲ့များသည် အဆိုပါနေရာတွင် အအေးပေးလုပ်ငန်းများ လုပ်ဆောင်နေကြောင်း ဒေသခံမီဒီယာများက ဖော်ပြသည်။
ဆေးရုံပြောရေးဆိုခွင့်ရှိသူက မှတ်ချက်ပေးရန် ဖုန်းခေါ်ဆိုမှုများကို ချက်ချင်းတုံ့ပြန်ခြင်း မရှိပါ။
ဝန်ကြီးချုပ် ရှက်ဘတ်ဇ် ရှာရစ်ဖ်သည် သေဆုံးမှုများအတွက် ဝမ်းနည်းကြောင်း ဖော်ပြခဲ့ပြီး ချက်ချင်းစုံစမ်းစစ်ဆေးရန် အမိန့်ပေးခဲ့သည်။ ၎င်း၏ရုံးမှ ထုတ်ပြန်ချက်တစ်ခုတွင် မွေး ကင်းစကလေးငယ် ၁၄ ဦး သေဆုံးကြောင်း အတည်ပြုခဲ့သည်။ “ကလေးများပါဝင်ပတ်သက်သည့် ကြေကွဲဖွယ်ဖြစ်ရပ်တစ်ခုသည် ပြန်လည်ပြင်ဆင်၍မရသော ဆုံးရှုံးမှုတစ်ခုပါ” ဟု ရှာရစ်ဖ်က ပြောကြားသည်။
Ref: apnews.com
Photo: bbc.com
ယနေ့ခေတ်
ပါကစ္စတန်နိုင်ငံ မြို့တော်ဆေးရုံရှိ ကလေးထိန်းဌာနတွင် မီးလောင် မွေးကင်းစကလေးငယ် ၁၄ ဦး သေဆုံး အတွက် မှတ်ချက်များ 0 ခုရှိပါတယ်