မက်ဆီကိုစီတီး၊ မတ် ၂၇
မက္ကဆီကိုမှ ကျူးဘားသို့ လူသားချင်းစာနာထောက်ထားမှုဆိုင်ရာ ထောက်ပံ့ရေးပစ္စည်းများ တင်ဆောင်လာသော ရွက်လှေနှစ်စင်း ပျောက်ဆုံးနေရာ ကာရစ်ဘီယံတွင် ရှာဖွေကယ်ဆယ်ရေးလုပ်ငန်းများ လုပ်ဆောင်နေကြောင်း သိရသည်။
အနည်းဆုံး သင်္ဘောသားကိုးဦးလိုက်ပါလာသော Friendship နှင့် Tigger Moth သင်္ဘောများကိုရှာဖွေရန် မက္ကဆီကိုသည် ရေတပ်အဖွဲ့များနှင့် စစ်ဘက်ရှာဖွေရေးလေယာဉ်များကို စေလွှတ်ခဲ့ကြောင်း မက္ကဆီကိုရေတပ်က ကြေညာချက်တစ်စောင်တွင် ပြောကြားသည်။
သင်္ဘောများသည် အင်္ဂါနေ့ သို့မဟုတ် ဗုဒ္ဓဟူးနေ့တွင် ဟာဗားနားသို့ရောက်ရှိရန် မျှော်လင့်ထားသော်လည်း ၎င်းတို့ထံမှ အဆက်အသွယ်မရရှိသည့်အပြင် ၎င်းတို့ရောက်ရှိကြောင်း အတည်ပြုချက်လည်း မရှိခဲ့ကြောင်း ရေတပ်က ပြောကြားသည်။
သင်္ဘောများကိုရှာဖွေရန်နှင့် သင်္ဘောသားများဘေးကင်းရေးကို သေချာစေရန်အတွက် ၎င်းတို့၏ အရင်းအမြစ်အားလုံးကိုအသုံးပြုရန် မက္ကဆီကိုရေတပ်က ကတိပြုထားကြောင်း ပြောကြားသည်။
ပျောက်ဆုံးနေသော သင်္ဘောနှစ်စင်းသည် မက္ကဆီကိုနိုင်ငံ Quintana Roo ပြည်နယ်ရှိ Isla Mujeres မှ မတ်လ ၂၀ ရက်နေ့တွင် ထွက်ခွာခဲ့သည်။
သင်္ဘောသားကိုးဦးသည် ပိုလန်၊ ပြင်သစ်၊ ကျူးဘားနှင့် အမေရိကန်တို့မှဖြစ်သည်။ မက္ကဆီကိုက နိုင်ငံအသီးသီးမှ ရေကြောင်းကယ်ဆယ်ရေး ညှိနှိုင်းရေးဌာနများ၊ ၎င်းတို့၏ သံတ မန်ကိုယ်စားလှယ်များနှင့် ဆက်သွယ်ထားပြီးဖြစ်ကြောင်း ပြောကြားသည်။
“ကပ္ပတိန်များနှင့် သင်္ဘောသားများသည် အတွေ့အကြုံရှိ ရေတပ်သားများနှင့် သင်္ဘောသားများဖြစ်ပြီး သင်္ဘောနှစ်စင်းစလုံးတွင် သင့်လျော်သော ဘေးကင်းရေးစနစ်များနှင့် အချက် ပြကိရိယာများ တပ်ဆင်ထားသည်” ဟု ပြောရေးဆိုခွင့်ရှိသူက ရိုက်တာသတင်းဌာနသို့ပေးပို့သော ကြေညာချက်တွင် ပြောကြားခဲ့သည်။
“ကျွန်ုပ်တို့သည် အာဏာပိုင်များနှင့် အပြည့်အဝပူးပေါင်းဆောင်ရွက်နေပြီး သင်္ဘောသားများ ဟာဗားနားသို့ ဘေးကင်းစွာရောက်ရှိနိုင်စွမ်းကို ယုံကြည်နေဆဲဖြစ်သည်။” ဟု ဆိုသည်။
ပျောက်ဆုံးနေသော သင်္ဘောများနှင့်ပတ်သက်၍ ကျူးဘားအစိုးရမှ မှတ်ချက်တစ်စုံတစ်ရာ မပေးခဲ့ပေ။
ယခုအပတ်အစောပိုင်းတွင် ကျူးဘားအစိုးရသည် လူသားချင်းစာနာထောက်ထားမှု အကူအညီ ၁၄ တန် သယ်ဆောင်လာသော နောက်ထပ်သင်္ဘောတစ်စင်းကို ကျယ်ကျယ်ပြန့်ပြန့် ဂုဏ်ပြုကြိုဆိုခဲ့ပြီး နွေးထွေးစွာ လက်ခံခဲ့သည်။
၁၉၅၀ ခုနှစ်များတွင် ကျူးဘားတော်လှန်ရေးကိုစတင်ရန် ဖီဒယ်ကက်စထရို ကျူးဘားသို့ ပြန်လည်ရောက်ရှိလာသည့် သင်္ဘောကိုအစွဲပြု၍ “Granma 2.0” ဟု အမည်ပေးထားသောသင်္ဘောသည် နေရောင်ခြည်စွမ်းအင်သုံး ဆိုလာပြားများ၊ ဆေးဝါးများ၊ ကလေးနို့မှုန့်များ၊ စက်ဘီးများနှင့် အစားအစာများကို ပို့ဆောင်ပေးခဲ့သည်။
ဇန်နဝါရီလတွင် အမေရိကန်သမ္မတ ဒေါ်နယ်ထရမ့်၏ ကွန်မြူနစ်အုပ်ချုပ်သောနိုင်ငံအပေါ် လောင်စာဆီပိတ်ပင်မှု စတင်ချိန်မှစ၍ စေတနာ့ဝန်ထမ်းများနှင့် အစိုးရမဟုတ်သောအဖွဲ့အစည်းများသည် ကျူးဘားသို့ လူသားချင်းစာနာထောက်ထားမှု အကူအညီများပေးအပ်ရန် ကြိုးပမ်းမှုများကို အဓိကဦးဆောင်ခဲ့ကြသည်။
လျှပ်စစ်ဓာတ်အားထောက်ပံ့မှု ကန့်သတ်ချက်များကြောင့် ကျူးဘားတွင် ခွဲစိတ်ကုသမှု ၅၀,၀၀၀ ကျော်ကို ဖျက်သိမ်းခဲ့ရပြီး ဆိုးရွားသော ထောက်ပံ့ရေး ပြတ်လပ်မှုအကြောင်း ကုလသမဂ္ဂက သတိပေးခဲ့သည်။
ကျူးဘားနိုင်ငံသည် အမေရိကန်၏ စွမ်းအင်ပိတ်ဆို့မှုအောက်တွင် တစ်နိုင်ငံလုံးအတိုင်းအတာဖြင့် လျှပ်စစ်ဓာတ်အားပြတ်တောက်မှုများစွာကို ရင်ဆိုင်နေရသောကြောင့် မကြာသေးမီရက်သတ္တပတ်များအတွင်း မက္ကဆီကို၏ လူသားချင်းစာနာထောက်ထားမှုဆိုင်ရာ ပို့ဆောင်မှုများကို အဓိကထားအားကိုးခဲ့ရသည်။
ဇန်နဝါရီလတွင် အမေရိကန်တပ်ဖွဲ့များက ဗင်နီဇွဲလားသမ္မတဟောင်း နီကိုလတ်စ် မာဒူရိုကို ဖမ်းဆီးပြီးကတည်းက ထရမ့်သည် ကျူးဘားအပေါ် ဖိအားများတိုးမြှင့်လုပ်ဆောင်ခဲ့သည်။
ဗင်နီဇွဲလားသည် ယခင်က ၎င်း၏ဒေသတွင်းမဟာမိတ်ဖြစ်သော ကျူးဘားသို့ ရေနံအမြောက်အမြား ထောက်ပံ့ပေးခဲ့သည်။
ပြီးခဲ့သည့်အပတ်က ထရမ့်သည် ကျူးဘားကို “ခင်မင်ရင်းနှီးစွာ သိမ်းပိုက်ခြင်း” ဖြစ်နိုင်ခြေကို စဉ်းစားခဲ့ပြီးနောက်ပိုင်းတွင် ၎င်းသည် “ဂုဏ်ယူစရာ” ဖြစ်လိမ့်မည်ဟု ပြောကြားခဲ့သည်။ ကျူးဘားဒုတိယနိုင်ငံခြားရေးဝန်ကြီး ကားလို့စ် ဖာနန်ဒက်ဇ် ဒီ ကော့စီယိုက “ကျူးဘား၏ နိုင်ငံရေးစနစ်သည် ညှိနှိုင်းရန်မသင့်တော်ပါ” ဟု တုံ့ပြန်သည့်အနေဖြင့် အခိုင်အမာပြောကြားခဲ့သည်။
ကျူးဘားသမ္မတ မီဂဲလ် ဒီယက်ဇ်-ကာနယ်က အမေရိကန်-ကျူးဘား ဆွေးနွေးပွဲများ၏ အစောပိုင်းအဆင့်များ စတင်နေပြီဟု ကြေညာခဲ့သော်လည်း ၎င်းတို့၏တိုးတက်မှုမှာ မရှင်းလင်းပါ။
Ref: bbc.com
ယနေ့ခေတ်
မက္ကဆီကိုမှ ကျူးဘားသို့ ဦးတည်လာသော အကူအညီပေးရေးသင်္ဘောနှစ်စင်း ပျောက်ဆုံးနေ အတွက် မှတ်ချက်များ 0 ခုရှိပါတယ်