ဘေဂျင်း၊ ဇန်နဝါရီ ၂၉
အိန္ဒိယနိုင်ငံအရှေ့ပိုင်း၊ အနောက်ဘင်္ဂလားပြည်နယ်တွင် အသက်အန္တရာယ်ရှိသော နီပါးဗိုင်းရပ်စ်ဖြစ်ပွားမှုသည် တရုတ်နိုင်ငံတွင် နှစ်သစ်ကူးအားလပ်ရက်မတိုင်မီ ခရီးသွားမည့် သန်းပေါင်းများစွာသော ခရီးသွားများအတွက် အာရုံစိုက်မှုနှင့် စိုးရိမ်မှုများကို ကျယ်ကျယ်ပြန့်ပြန့်ဖြစ်ပေါ်စေခဲ့သည်။
အနောက်ဘင်္ဂလားတွင် နီပါးဗိုင်းရပ်စ်သည် အနည်းဆုံးလူငါးဦးကိုကူးစက်ခဲ့ပြီး တစ်ဦးမှာ အခြေအနေစိုးရိမ်ရသည်။ အဆိုပါနီပါးဗိုင်းရပ်စ်သည် တရုတ်နိုင်ငံတွင် ကူးစက်ရန်ခက်ခဲပြီး ဖြစ်ပွားမှုဖြစ်နိုင်ခြေနည်းကြောင်း တရုတ်ကျန်းမာရေးပညာရှင်များက ပြောကြားသည်။
သေဆုံးမှုနှုန်း ၇၅% အထိရှိပြီး ထိရောက်သောကုသမှု သို့မဟုတ် ကာကွယ်ဆေးမရှိသောကြောင့် ဗိုင်းရပ်စ်သည် တရုတ်နိုင်ငံကို မငြိမ်မသက်ဖြစ်စေခဲ့ပြီး ဆက်စပ်အကြောင်းအရာများသည် နိုင်ငံ၏လူမှုကွန်ရက်များ၌ တနင်္လာနေ့တွင် ခေတ်စားလာခဲ့သည်။
“ အရမ်းကြောက်စရာကောင်းတယ်၊ အထူးသဖြင့် နွေဦးပွဲတော်နီးလာတာနဲ့အမျှပေါ့။ နောက်ထပ် lockdown တွေ မကြုံချင်တော့ဘူး” ဟု အွန်လိုင်းအသုံးပြုသူတစ်ဦးက တရုတ်နှစ်သစ်ကူးအားလပ်ရက်ကို ရည်ညွှန်း၍ ပြောကြားသည်။ နောက်တစ်ဦးက “ အိန္ဒိယနှင့် ခရီးသွားလမ်းကြောင်းကို ယာယီပိတ်လို့မရဘူးလား” ဟု ဆိုသည်။
ပြီးခဲ့သည့်လက တရုတ်နှင့် အိန္ဒိယတို့သည် ကမ္ဘာ့လူဦးရေအများဆုံးနိုင်ငံနှစ်ခုကြား ခရီးသွားလာမှုကို မြှင့်တင်ရန်ရည်ရွယ်သည့် လုပ်ဆောင်ချက်တစ်ခုအနေဖြင့် ဗီဇာစည်းမျဉ်းများကို အပြန်အလှန်ဖြေလျှော့ပေးခဲ့သည်။
တရုတ်နိုင်ငံအတွက် ကျန်းမာရေးခြိမ်းခြောက်မှုအချိန်သည် တရုတ်နှစ်သစ်ကူးနီးကပ်လာသည်နှင့်အမျှ စိုးရိမ်စရာတစ်ခုဖြစ်ပြီး၊ နိုင်ငံအတွင်း ပြည်ပသို့ခရီးသွားလာမှု အလွန်များပြားသောကာလဖြစ်သည်။ ချွန်ယွန်ဟုလူသိများသော ရက် ၄၀ ကြာ ခရီးသွားလာမှုကာလသည် ယခုနှစ်တွင် ဖေဖော်ဝါရီ ၂ ရက်မှ မတ်လ ၁၃ ရက်အထိဖြစ်သည်။
ပြီးခဲ့သည့်သောကြာနေ့ကထုတ်ပြန်သော အစီရင်ခံစာတစ်ခုတွင် တရုတ်နိုင်ငံ၏ ရောဂါထိန်းချုပ်ရေးနှင့် ကာကွယ်ရေးဌာနက ပွဲတော်ကာလအတွင်း ပြည်ပမှပြန်လာသော ခရီးသွားများမှတစ်ဆင့် ကူးစက်နိုင်သည့် ငှက်ဖျား၊ သွေးလွန်တုပ်ကွေး၊ ချီကွန်ဂွန်ညာဖျားနှင့် လာဆာဖျားအပါအဝင် ကူးစက်ရောဂါများ၏အန္တရာယ်ကို ပိုမိုသတိထားရန် ပြောကြားသည်။
သို့သော် အိန္ဒိယမီဒီယာများ၏ ကပ်ရောဂါဖြစ်ပွားမှုနှင့်ပတ်သက်သည့် သတင်းများကို ဇန်နဝါရီလလယ်အထိတွေ့ ရသော်လည်း နီပါးဗိုင်းရပ်စ်သတင်းများကို မတွေ့ရချေ။ ဇန်နဝါရီ ၁၁ ရက်နေ့က အနောက်ဘင်္ဂလားပြည်နယ်၊ နာဒီယာခရိုင်ရှိ All India Institute of Medical Sciences မှ ကျန်းမာရေးစောင့်ရှောက်မှုဝန်ထမ်းနှစ်ဦးတွင် ၎င်းပိုးတွေ့ရှိခဲ့ကြောင်း သတင်းများထွက်ပေါ်ခဲ့သည်။
နီပါးသည် လက်တလောတွင် တိကျသောဆေးဝါး သို့မဟုတ် ကာကွယ်ဆေးများမရှိသေးသည့် အသက်အန္တရာယ်ရှိသော ဗိုင်းရပ်စ်တစ်မျိုးဖြစ်သည်။ ရောဂါလက္ခဏာများ၏ ပြင်း ထန်မှုသည် ရောဂါလက္ခဏာမပြသော ကူးစက်မှုမှ အသက်ရှူလမ်းကြောင်းဆိုင်ရာ ရောဂါပြင်းထန်မှုအထိ အမျိုးမျိုးအစားစားကွဲပြားနိုင်သည်။
နီပါးကူးစက်မှု၏ အဆိုးရွားဆုံးနောက်ဆက်တွဲပြဿနာမှာ ဦးနှောက်ရောင်ရမ်းခြင်းဖြစ်ပြီး encephalitis ဟု လူသိများသည်။ အာရုံကြောဆိုင်ရာလက္ခဏာများတွင် စိတ်ရှုပ်ထွေးခြင်း၊ သတိလစ်ခြင်း၊ တက်ခြင်းနှင့် မေ့မြောခြင်းတို့ပါဝင်ပြီး ရောဂါစတင်ဖြစ်ပွားပြီးနောက် ရက်အနည်းငယ်မှ ရက်သတ္တပတ်အနည်းငယ်အထိ ပေါ်လာလေ့ရှိသည်။
သို့သော် ကျန်းမာရေးပညာရှင်များက ဗိုင်းရပ်စ်ကြောင့် တရုတ်နိုင်ငံတွင် ဖြစ်ပေါ်လာနိုင်သောအန္တရာယ်ကို ယေဘုယျအားဖြင့် စီမံခန့်ခွဲနိုင်သောအန္တရာယ်အဖြစ် ဖော်ပြခဲ့သည်။
နီပါးအပါအဝင် အလွန်အမင်းကူးစက်စေသော ဗိုင်းရပ်စ်များကိုလေ့လာသော ဝူဟန်တက္ကသိုလ်မှ ဗိုင်းရပ်စ်ဗေဒပညာရှင် ဂျောင် ဟေယန်၏အဆိုအရ အိမ်နီးချင်းနိုင်ငံအချို့တွင် ၁၉၉၈ ခုနှစ်တွင် ဗိုင်းရပ်စ်ပေါ်ပေါက်လာပြီးကတည်းက နှစ်စဉ်နီးပါး ရံဖန်ရံခါဖြစ်ပွားမှုများရှိခဲ့ကြောင်း သတင်းထုတ်ပြန်ခဲ့ပြီး တရုတ်နိုင်ငံတွင် ပြည်ပမှဝင်ရောက်လာသော ကူး စက်မှုများကို မှတ်တမ်းတင်ထားခြင်းမရှိပါ။
လူသားများတွင် နီပါးဗိုင်းရပ်စ်ကူးစက်မှုသည် အဓိကအားဖြင့် ကူးစက်ခံထားရသော တိရစ္ဆာန်များ၊ အထူးသဖြင့် လင်းနို့များ သို့မဟုတ် ဝက်များနှင့် တိုက်ရိုက်ထိတွေ့ခြင်း သို့မ ဟုတ် တံတွေး၊ ဆီး သို့မဟုတ် မစင်ကဲ့သို့သော တိရစ္ဆာန်ထွက်ပစ္စည်းများဖြင့် ညစ်ညမ်းနေသော အစားအစာများကို စားသုံးခြင်းနှင့် ဆက်စပ်နေသည်ဟု ဆိုသည်။
Ref: bangkokpost.com
#ယနေ့ခေတ်
အိန္ဒိယနိုင်ငံတွင် တရုတ်နှစ်သစ်ကူးမတိုင်မီ နီပါးဗိုင်းရပ်စ်ကူးစက်မှုကြောင့် တရုတ်နိုင်ငံတွင် စိုးရိမ်မှုများမြင့်တက် အတွက် မှတ်ချက်များ 0 ခုရှိပါတယ်