မနီလာ၊ မေ ၂၈
လာအိုနိုင်ငံရှိ ရေကြီးနေသော ဂူတစ်ခုတွင် တစ်ပတ်ကြာပိတ်မိနေသော အသက်ရှင်ကျန်ရစ်သူများကို ရှာဖွေတွေ့ ရှိခဲ့ခြင်းအတွက် ကယ်ဆယ်ရေးသမားများက ဝမ်းမြောက်မိကြောင်း ပြောကြားခဲ့သော်လည်း ၎င်းတို့ကိုကယ်ထုတ်ရန် ခက်ခဲနိုင်ကြောင်း သတိပေးထားသည်။
ဗုဒ္ဓဟူးနေ့ မွန်းလွဲပိုင်းတွင် လူငါးဦးကို အသက်ရှင်လျက်တွေ့ရှိခဲ့ပြီး ကယ်ဆယ်ရေးသမားများသည် ပျောက်ဆုံးနေဆဲနှစ်ဦးကို ရှာဖွေနေကြသည်။
ရွှေရှာဖွေရန် ဂူထဲသို့ဝင်ရောက်ခဲ့သော ခုနစ်ဦးအဖွဲ့သည် မိုးသည်းထန်စွာရွာသွန်းမှုကြောင့် ဂူအတွင်းရေလွှမ်းမိုးပြီး ဝင်ပေါက်ကို ကျောက်စရစ်နှင့် မြေမှုန့်များပိတ်ဆို့ခဲ့ပြီးနောက် ပိတ်မိနေခဲ့သည်။ ကယ်ဆယ်ရေးသမားများက ဒေသစံတော်ချိန်ညနေ ၄:၃၀ နာရီခန့်တွင် ဂူဝင်ပေါက်မှ မီတာ ၃၀၀ ခန့်အကွာတွင် ပိတ်မိနေသူများအနက် ငါးဦးကိုတွေ့ရှိခဲ့ကြောင်း ပြောကြားသည်။
ကယ်ဆယ်ရေး ရေငုပ်သမားနှစ်ဦးဖြစ်သည့် မစ်ကို ပါစီနှင့် နိုရာဆတ် ပါလာဆင်းတို့၏ ဗီဒီယိုအရ ရွှံ့နွံများပြည့်နှက်နေသောဂူ၏ အခန်းငယ်တစ်ခုတွင် သတ္တုတွင်းလုပ်သားများ အတူတကွစုဝေးနေသည်ကို တွေ့ရှိခဲ့သည်။
ကယ်ဆယ်ရေးလုပ်ငန်းတွင်ပါဝင်ရန် လာအိုအစိုးရမှဖိတ်ကြားထားသော ထိုင်းအဖွဲ့အစည်းတစ်ခုဖြစ်သည့် Metta Tham Rescue ၏ဥက္ကဋ္ဌ Kengkard Bongkawong က မျှဝေထားသော ဗီဒီယိုတစ်ခု၏နောက်ခံတွင် ငိုကြွေးသံများကို ကြားနိုင်သည်။
ဗီဒီယိုများတွင် အသက်ရှင်ကျန်ရစ်သူငါးဦးက ကယ်ဆယ်ရေးသမားများအား ၎င်းတို့သည် ဆာလောင်မွတ်သိပ်နေသော်လည်း ဒဏ်ရာရရှိခြင်း သို့မဟုတ် ဖျားနာခြင်းမရှိကြောင်း ပြောကြားသည်။ ၎င်းတို့အနက် နှစ်ဦးတွင် မီးအိမ်များဆက်လက်ထွန်းညှိနေနိုင်ပုံရသည်။
ထိုင်းနိုင်ငံအခြေစိုက် ဖင်လန်ဂူရေငုပ်သမားပါစီက အသက်ရှင်ကျန်ရစ်သူများသည် ကျန်းမာပြီး စိတ်ဓာတ်ကောင်းမွန်နေသည်ကို တွေ့ရှိရခြင်းက “ခဏတာ စိတ်သက်သာရာရမှု” ဖြစ်သည်ဟု ဆိုသည်။ “ဒါပေမယ့် ကယ်ဆယ်ရေးလုပ်ငန်းတွေက ရှေ့ဆက်နေဆဲဖြစ်ပြီး လွယ်ကူမှာမဟုတ်ဘူး” ဟု သူက လူမှုကွန်ရက်တွင် ပြောကြားသည်။
သူနှင့် အခြားရေငုပ်သမားတစ်ဦးသည် သတ္တုတွင်းလုပ်သားများအား ခွန်အားရရှိစေရန်နှင့် ခရီးအတွက်ပြင်ဆင်ရန် ပစ္စည်းများယူဆောင်လာရန် လိုအပ်ကြောင်း ရေးသားခဲ့သည်။
ရေငုပ်သမားနှစ်ဦးနှင့် မေတ္တာသမ်ကယ်ဆယ်ရေးအဖွဲ့သည် ရေကြီးပြီးနောက် ၁၈ ရက်ကြာ ထိုင်းနိုင်ငံမြောက်ပိုင်း ချင်းရိုင်ရှိဂူတစ်ခုတွင် ပိတ်မိနေသော Wild Boars လူငယ်ဘောလုံးအသင်းဝင်များကို ၂၀၁၈ ခုနှစ်တွင် အောင်မြင်စွာကယ်တင်ရာတွင်လည်း ပါဝင်ခဲ့သည်။
ဤကယ်ဆယ်ရေးလုပ်ငန်းသည် ရေလွှမ်းမိုးနေသောလမ်းကြောင်းများ၊ ညစ်ညမ်းနိုင်သောလေနှင့် ကျဉ်းမြောင်းသောဥမင်လိုဏ်ခေါင်းများအပါအဝင် အန္တရာယ်ရှိသောအခြေအနေများကြောင့် ရှုပ်ထွေးနေခဲ့သည်။
ပါစီက အင်္ဂါနေ့နှောင်းပိုင်းတွင် အင်တာဗျူးတစ်ခုတွင် သတ္တုတွင်းလုပ်သားအဖြစ် ၃၀ နှစ်တာ ရေငုပ်ခဲ့သည့်ကာလအတွင်း ဤကဲ့သို့ ကျဉ်းမြောင်းသောဥမင်လိုဏ်ခေါင်းများကို တစ်ခါမှမမြင်ဖူးကြောင်း ပြောကြားခဲ့သည်။ ဂူထဲကဥမင်များက ရှည်လျားပြီး မတ်တပ်ရပ်ရန် အနည်းငယ်သာကျယ်ဝန်းသည်ဟု သူက ပြောသည်။
“ဒါပေမယ့် ဒါကလွဲရင် လျှောကျတာ ဒါမှမဟုတ် ယိမ်းထိုးနေတာပါပဲ” ဟု ၎င်းက ဆိုသည်။ “လှည့်လို့မရတဲ့အတွက် အရမ်းခက်ခဲပြီး အန္တရာယ်များပါတယ်” ဟု သူက ထပ်လောင်းပြောကြားသည်။ ကျဉ်းကျပ်သည့်ပတ်ဝန်းကျင်က စိုးရိမ်ပူပန်မှုများကို ပိုမိုဖြစ်ပေါ်စေသည်ဟုလည်း ၎င်းက ထပ်လောင်းပြောကြားသည်။
လူများကိုမတွေ့ရှိမီ အင်တာဗျူးတွင် ပါစီက ကယ်ဆယ်ရေးမှာ ဂူထဲကရေများကို စုပ်ထုတ်ရမည်ဖြစ်သည်ဟု ပြောသည်။ “ကျွန်တော်တို့ သူတို့ကို ရေငုပ်ပြီ’ ထုတ်ယူလို့မရပါဘူး၊ အခန်းကအရမ်းသေးလွန်းတယ်၊ အရမ်းကျပ်တယ်၊ အရမ်းအန္တရာယ်များတယ်” ဟု သူက ပြောသည်။
Ref: bangkokpost.com
ယနေ့ခေတ်
လာအိုနိုင်ငံရှိ ဂူတစ်ခုအတွင်းပိတ်မိသူများထဲမှ အသက်ရှင်ကျန်ရစ်သူများကို ကယ်တင်ရန် ကြံစည်နေဆဲ ဟုဆို အတွက် မှတ်ချက်များ 0 ခုရှိပါတယ်