ညောင်တုန်း၊ မေ ၂၆
ဧရာဝတီတိုင်းဒေသကြီး၊ ညောင်တုန်းမြို့နယ်၊ (၅) ရပ်ကွက်၊ ညောင်ချောင်းသာအနီးတွင် မေ ၂၄ ရက်၊ ည ၁၁ နာရီ ၅၀ မိနစ်က ကမ်းပါးပြိုပြီး လူနေအိမ် ၅၀ ကျော်ခန့် ပျက်စီးဆုံးရှုံးခဲ့ရကြောင်း သိရသည်။
ညောင်ချောင်းသာအနီး၌ ကမ်းပြိုကျမူကြောင့် လူနေအိမ် ၁၈ လုံး ရေနစ်မြောပျက်စီးပြီး အခြားလူနေအိမ် ၃၅ လုံး ကမ်းပါးပြိုကျခြင်းကြောင့် ပျက်စီးဆုံးရှုံးမှုရှိခဲ့ကြောင်း ညောင်တုန်းလူမူကူညီရေးအသင်းမှ စုံစမ်းသိရှိရသည်။
“ညတွင်းချင်းမှာ ရေနစ်မြောပျက်စီးတဲ့နေအိမ်နဲ့ ကမ်းပါးပြိုကျပြီး ပျက်စီးဆုံးရှူံးခဲ့ရတဲ့ ပြည်သူတွေကို ရေဘေးလွတ်ရာကို အချိန်မီကယ်တင်ပေးနိုင်ခဲ့ပါတယ်။ မိုးသည်းထန်စွာရွာသွန်းပြီး ရေကြီးရေလျှံမှုကြောင့် ကမ်းပါးဘေးနေအိမ်တွေပျက်စီးခဲ့ရတာပါ” ဟု ညောင်တုန်းလူမှုကူညီရေးအသင်းမှ တာဝန်ရှိသူတစ်ဦးက ယနေ့ခေတ်သို့ ပြောသည်။
ညောင်ချောင်းသာကမ်းပါးအနီးတွင်နေထိုင်သူ အိမ်ထောင်စု ၇၀ ကျော်ခန့်ရှိပြီး သက်ကြီးရွယ်အိုများနှင့် ကလေးသူငယ်များအပါအဝင် ရေဘေးလွတ်ရာသို့ ရွှေ့ပြောင်းနေထိုင်ရေးအတွက် ကူညီဆောင်ရွက်ပေးခဲ့ကြောင်း မြန်မာနိုင်ငံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါကမ်းပါးပြိုကျမူကြောင့် ရေဘေးလွတ်ရာသို့ ရွှေ့ပြောင်းနေထိုင်သူများတွင် စောင်၊ ခြင်၊ ခေါင်းအုံးများ အရေးပေါ်လိုအပ်နေကြောင်း သိရသည်။
#မြင့်မြတ်အောင်မြင်
ဓာတ်ပုံ – ညောင်တုန်းလူမှုကူညီရေးအသင်း
#ယနေ့ခေတ်
ညောင်ချောင်းသာအနီးတွင် ကမ်းပါးပြိုပြီး လူနေအိမ် ၅၀ ကျော်ခန့် ပျက်စီးဆုံးရှုံး အတွက် မှတ်ချက်များ 0 ခုရှိပါတယ်