ဘန်ကောက်၊ ဇွန် ၁၃
ထိုင်းနိုင်ငံ၊ ဖူးခက်မှ အိန္ဒိယနိုင်ငံမြို့တော်၊ နယူးဒေလီသို့ ပျံသန်းလာသည့် Air India လေယာဉ်သည် ဇွန်လ ၁၃ ရက်တွင် လေယာဉ်ပေါ်ဗုံးပါလာသည်ဟူသည့် ခြိမ်းခြောက်မှုခံရပြီး ထိုင်းတောင်ပိုင်းကျွန်းတစ်ခုပေါ်သို့ အရေးပေါ်ဆင်းသက်ခဲ့ရကြောင်း လေဆိပ်အာဏာပိုင်များက ပြောကြားခဲ့သည်။
အဆိုပါဖြစ်ရပ်ကြောင့် အရေးပေါ်အစီအစဉ်များဖြင့် ခရီးသည် ၁၅၆ ဦးစလုံးကို AI379 လေယာဉ်က လိုက်ပါပို့ဆောင်ခဲ့ကြောင်း ထိုင်းလေဆိပ်တာဝန်ရှိသူတစ်ဦးက ပြောကြားခဲ့သည်။
အဆိုပါလေယာဉ်သည် ဖူးခက်လေဆိပ်မှ အိန္ဒိယနိုင်ငံမြို့တော်သို့ သောကြာနေ့နံနက်၊ စင်္ကာပူစံတော်ချိန် နံနက် ၉ နာရီ ၃၀ မိနစ်တွင် ပျံတက်ခဲ့ပြီး ကပ္ပလီပင်လယ်ပြင်ကိုလှည့်ပတ်ကာ ထိုင်းတောင်ပိုင်းကျွန်းပေါ်သို့ ပြန်လည်ဆင်းသက်ခဲ့ကြောင်း လေယာဉ်ခြေရာခံ Flightradar24 မှ ပြောကြားသည်။
ဆိုရှယ်မီဒီယာပေါ်မှ ဓာတ်ပုံများအရ AI379 လေယာဉ်သည် အိန္ဒိယလေကြောင်းလိုင်း Vistara ၏လိုဂိုနှင့် တံဆိပ်တပ်ဆင်ထားသည်။ 2024 ခုနှစ်တွင် အိန္ဒိယအစိုးရ၏ခွင့်ပြုချက်ဖြင့် ၎င်းတို့၏ပေါင်းစည်းမှုမှစတင်ကာ Vistara လေယာဉ်များကို Air India မှ ပူးပေါင်းဆောင်ရွက်ခဲ့သည်။
အဆိုပါဖြစ်ရပ်သည် ကြာသပတေးနေ့က အမတ်ဒါဘတ်၌ Air India လေယာဉ်တစ်စင်းပျံတက်ပြီးမကြာမီ ပျက်ကျခဲ့ပြီး လူပေါင်း ၂၄၀ ကျော်သေဆုံးခဲ့သည့်ဖြစ်ရပ်အပြီး ပေါ် ပေါက်လာခြင်းဖြစ်သည်။
ပဏာမရှာဖွေမှုအပြီးတွင် လေယာဉ်ပေါ်တွင် ဗုံးတစ်လုံးမှမတွေ့ရှိခဲ့ကြောင်း အာဏာပိုင်များက ပြောကြားခဲ့သည်။ သို့သော် ဗုံးခြိမ်းခြောက်မှုပါရှိသည့်စာရွက်ကို တွေ့ရှိခဲ့သည်။ အ ဆိုပါအခြေအနေနှင့်ပတ်သက်ပြီး ခရီးသည်တစ်ဦးကို စစ်ဆေးမေးမြန်းနေကြောင်း တာဝန်ရှိသူက ဆက်လက်ပြောသည်။
အိန္ဒိယလေကြောင်းလိုင်းများနှင့် လေဆိပ်များသည် ယမန်နှစ်တွင် ဗုံးခြိမ်းခြောက်မှုများ မကြာခဏကြုံတွေ့ခဲ့ရပြီး ယမန်နှစ် ပထမ ၁၀ လအတွင်း လှည့်ဖြားဖုန်းခေါ်ဆိုမှုနှင့် မက်ဆေ့ချ်ပေါင်း ၁,၀၀၀ နီးပါးရရှိခဲ့ပြီး၊ ၂၀၂၃ ခုနှစ်ကထက် ၁၀ ဆနီးပါးမြင့်တက်လာခဲ့သည်။
Ref: CNA
#ယနေ့ခေတ်
ဗုံးခြိမ်းခြောက်မှုကြောင့် Air India လေယာဉ် ထိုင်းနိုင်ငံတွင်အရေးပေါ်ဆင်းသက်ခဲ့ရ အတွက် မှတ်ချက်များ 0 ခုရှိပါတယ်