မအူပင်၊ ဇွန် ၁၅
ဧရာဝတီတိုင်းဒေသကြီး၊ မအူပင်မြို့နယ်၊ မင်းလမ်းတွင် ဇွန် ၁၅ ရက်၊ နံနက်အစောပိုင်းက လူနာတင်ဆောင်လာသည့် လိုက်ထရပ်ကားနှင့် ဖို့ဒ်ရိန်းဂျားတံဆိပ် အိမ်စီးကားတို့ အရှိန်ပြင်းစွာတိုက်မိခြင်းကြောင့် လူနှစ်ဦးသေဆုံးခဲ့ကြောင်း သိရသည်။
ပန်းတနော်မြို့နယ်မှ မအူပင်မြို့နယ်သို့ လူနာတင်ဆောင်လာသည့် လိုက်ထရပ်ကားခါးပိုင်းအား အိမ်စီးကားတစ်စီးက ဝင်ရောက်တိုက်မိခြင်းကြောင့် လူနှစ်ဦးနေရာတွင်သေဆုံးပြီး ငါးဦးထိခိုက်ဒဏ်ရာရရှိခဲ့ကြောင်း သိရသည်။
“ပန်းတနော်မြို့ကနေ မအူပင်မြို့နယ်မှာ လူနာကိုဆေးခန်းပြဖို့ လိုက်ထရပ်ကားနဲ့လာကြသူတွေပါ။ အခု ကားတိုက်မှုကြောင့် သက်ကြီးပိုင်းအမျိုးသားတစ်ဦးနဲ့ သက်လတ်ပိုင်းအမျိုးသမီးတစ်ဦး နေရာမှာပဲသေဆုံးသွားကြပါတယ်” ဟု မအူပင်မြို့နယ် လူမှုကူညီရေးအသင်းတစ်ခုမှ တာဝန်ရှိသူတစ်ဦးက ယနေ့ခေတ်သို့ ပြောသည်။
ဖို့ဒ်ရိန်းဂျား အိမ်စီးကားသည် မအူပင်စျေးလမ်းအတွင်းမှ မင်းလမ်းပေါ်သို့ အရှိန်ဖြင့်တက်လာချိန်တွင် လူနာတင်လိုက်ထရပ်ကားအား တိုက်မိခဲ့ခြင်းဖြစ်ကြောင်း သိရသည်။
လက်ရှိတွင် အဆိုပါယာဉ်တိုက်မှုကြောင့် သေဆုံးသူနှင့် ထိခိုက်ဒဏ်ရာရရှိသူများကို မအူပင်မြို့နယ်၊ လူမှုကူညီကယ်ဆယ်ရေးအဖွဲ့က မအူပင်မြို့ဆေးရုံကြီးသို့ ကူညီပို့ဆောင်ပေးခဲ့ကြောင်း သိရသည်။
မအူပင်မြို့နယ်တွင် လမ်းအကျယ်အဝန်းကျဉ်းမြောင်းခြင်းကြောင့် ယာဉ်တိုက်မှုများ မကြာခဏဖြစ်ပွားနေပြီး ယာဉ်စည်းကမ်းနှင့် လမ်းစည်းကမ်းများကို စနစ်တကျလိုက်နာကျင့်သုံးနိုင်ရန်အတွက် လူထုအသိပညာပေးများ ဆောင်ရွက်ပေးရန် လိုအပ်နေကြောင်း မအူပင်မြို့နေ ဒေသခံများက ပြောကြားသည်။
#မြင့်မြတ်အောင်မြင်
#ဓာတ်ပုံ – မအူပင်မြို့နယ်လူမှုကူညီရေးအသင်း
#ယနေ့ခေတ်
မအူပင်တွင် လူနာတင်ဆောင်လာသည့် လိုက်ထရပ်ကားနှင့် အိမ်စီးကားတို့တိုက်မိပြီး နှစ်ဦးသေဆုံး အတွက် မှတ်ချက်များ 0 ခုရှိပါတယ်