အိုဒီဆာ၊ ဇန်နဝါရီ ၂၈
ယူကရိန်းရှိ ရုရှားတပ်ဖွဲ့များသည် အင်္ဂါနေ့ညက စွမ်းအင်အခြေခံအဆောက်အအုံနှင့် ခရီးသည်တင်ရထားတစ်စင်းကို တိုက်ခိုက်ခဲ့ရာ လူ ၁၂ ဦးသေဆုံးခဲ့ကြောင်း အာဏာပိုင်များက ပြောကြားသည်။ လေးနှစ်နီးပါးကြာစစ်ပွဲကို အဆုံးသတ်ရန် နှစ်ဖက်စလုံးမှ ညှိနှိုင်းရေးမှူးများ တိုက်ရိုက်ဆွေးနွေးပွဲများပြုလုပ်ပြီး ရက်အနည်းငယ်အကြာတွင် အဆိုပါတိုက်ခိုက်မှု ဖြစ်ပွားခဲ့ခြင်းဖြစ်သည်။
အရှေ့မြောက်ပိုင်း ခါကိဗ်ဒေသတွင် ခရီးသည် ၂၀၀ နီးပါး လိုက်ပါလာသော ရထားတွဲကို ဒရုန်းတစ်စင်းက ထိမှန်ခဲ့ပြီး အနည်းဆုံး လူ ၅ ဦး သေဆုံးခဲ့ကြောင်း ယူကရိန်းဝန်ကြီးချုပ် ယူလီယာ ဆဗီရီဒန်ကိုက X တွင် မျှဝေခဲ့သည်။
“ ရထားတွဲတစ်ခုမှ အရပ်သားများကို သတ်ဖြတ်ခြင်းအတွက် စစ်ရေးအကြောင်းပြချက် တစ်စုံတစ်ရာ မရှိကြောင်း နှင့် မဖြစ်နိုင်ကြောင်း” ယူကရိန်းသမ္မတ ဗိုလိုဒီမာ ဇီလင်စကီးက Telegram တွင် ပြောကြားခဲ့သည်။
ဒေသဆိုင်ရာ အရေးပေါ်ကယ်ဆယ်ရေးအဖွဲ့များက မီးငြှိမ်းသတ်နိုင်ပြီဖြစ်ကြောင်း နောက်ပိုင်းတွင် ပြောကြားခဲ့ပြီး မီးလောင်နေသော ရထားတွဲ၏ပုံများကို အစိုးရရှေ့နေများက လူမှုမီဒီယာတွင် မျှဝေခဲ့သည်။
ရုရှားဒရုန်း ၅၀ ကျော်ကြောင့် တောင်ပိုင်း အိုဒီဆာမြို့တွင် လူသုံးဦးသေဆုံးပြီး ၃၀ ကျော် ဒဏ်ရာရရှိခဲ့ကြောင်း ဒေသဆိုင်ရာအရာရှိများက ပြောကြားခဲ့သည်။
ယူကရိန်းပို့ကုန်များအတွက် အဓိကကျသော ပင်လယ်နက်မြို့ကို ရုရှားတပ်ဖွဲ့များက ပုံမှန်တိုက်ခိုက်လေ့ရှိသည်။
ဒဏ်ရာရသူများထဲတွင် ကိုယ်ဝန် ၃၉ ပတ်ရှိသော အမျိုးသမီးတစ်ဦးနှင့် မိန်းကလေးနှစ်ဦးပါဝင်ကြောင်း ဒေသဆိုင်ရာအုပ်ချုပ်ရေးမှူး အိုလတ် ကီပါက ပြောကြားခဲ့သည်။
အခင်းဖြစ်ပွားရာနေရာရှိ AFP သတင်းထောက်တစ်ဦးက လူနေအိမ်တစ်လုံး၏ မျက်နှာစာပြိုကျနေသည်ကို မြင်တွေ့ခဲ့ရပြီး ကယ်ဆယ်ရေးလုပ်သားများသည် အပျက်အစီးများကြားတွင် ထိခိုက်ဒဏ်ရာရသူများကို ရှာဖွေနေ ကြသည်ဟု ဆိုသည်။
ဗုံးကြဲတိုက်ခိုက်မှုသည် ငြိမ်းချမ်းရေးကြိုးပမ်းမှုများကို ထိခိုက်စေပြီး စစ်ပွဲကိုအဆုံးသတ်ရန် မော်စကိုအပေါ် ဖိအားပေးရန် မဟာမိတ်များကို တိုက်တွန်းကြောင်း ဇီလင်စကီးက ပြောကြားသည်။
“ ရုရှား၏တိုက်ခိုက်မှုတိုင်းသည် ဆက်လက်ဖြစ်ပွားနေဆဲ သံတမန်ရေးကို ပျက်စီးစေပြီး ဤစစ်ပွဲကို အဆုံးသတ် ရန် ကူညီပေးနေသော မိတ်ဖက်များ၏ ကြိုးပမ်းမှုများကိုလည်း ပျက်စီးစေသည်” ဟု ၎င်းက လူမှုမီဒီယာတွင် ရေး သားခဲ့သည်။
ရုရှားနှင့် ယူကရိန်း ညှိနှိုင်းရေးမှူးများသည် အမေရိကန်၏ ကြားဝင်စေ့စပ်မှုဖြင့် ပဋိပက္ခကိုအဆုံးသတ်ရန် ရည် ရွယ်သည့် ဆွေးနွေးပွဲများအတွက် ပြီးခဲ့သည့်အပတ်က အာရပ်စော်ဘွားများပြည်ထောင်စုတွင် တွေ့ဆုံခဲ့ပြီးနောက်ပိုင်း ရာသီဥတုအေးခဲနေချိန်တွင် လျှပ်စစ်ဓာတ်အားပြတ်တောက်ကာ ယူကရိန်းနိုင်ငံသားများစွာကို သေစေနိုင်သည့် စွမ်းအင်အခြေ ခံအဆောက်အအုံများအပေါ် တိုက်ခိုက်မှုများသည် ဆက်လက်ဖြစ်ပွားနေခဲ့သည်။
ဆွေးနွေးပွဲများကို ဖေဖော်ဝါရီ ၁ ရက်တွင် နောက်တစ်ကြိမ်ကျင်းပရန် မျှော်လင့်ရကြောင်း ဇီလင်စကီးက ပြောကြားသည်။
Ref: bangkokpost.com
#ယနေ့ခေတ်
ယူကရိန်းတွင် ရုရှားတိုက်ခိုက်မှုကြောင့် ၁၂ ဦးသေဆုံး၊ ခရီးသည်တင်ရထားကို ပစ်မှတ်ထား အတွက် မှတ်ချက်များ 0 ခုရှိပါတယ်