ရန်ကုန်၊ သြဂုတ် ၆
ရန်ကုန်တိုင်းဒေသကြီး၊ ကျောက်တံတားမြို့နယ်၊ မဟာဗန္ဓုလပန်းခြံလမ်းကို သြဂုတ် ၅ ရက်တွင် ပြန်လည်ဖွင့်လှစ်ပေးလိုက်ပြီးနောက် သြဂုတ် ၆ ရက်နေ့တွင် မြို့တော်ခန်းမဘေးပတ်လည်လမ်းများကို ပြန်လည်ဖွင့်လှစ်ပေးခဲ့ကြောင်း သိရသည်။
မဟာဗန္ဓုလပန်းခြံလမ်း၊ ရန်ကုန်မြို့တော်ခန်းမဘေးပတ်လမ်းနှင့် ၃၄ လမ်း၊ ၃၅ လမ်းတို့အားလုံးကို သြဂုတ် ၆ ရက်၊ နံနက် ၁၀ နာရီတွင် သက်ဆိုင်ရာတာဝန်ရှိသူများက လိုက်လံဖွင့်လှစ်ပေးလိုက်ကြောင်း သိရသည်။
“လေးနှစ်လောက် ဖြတ်သန်းသွားလာခွင့် ပိတ်ထားခံရတဲ့လမ်းလေး ပြန်ဖွင့်ပြီတော့ သွားရေးလာရေးအဆင်ပြေသွားပါပြီ။ မဟုတ်ရင် ဆူးလေမြို့တော်ခန်းမတစ်ပတ် ပတ်လျှောက်ရပါတယ်။ ဓာတ်ပုံဆိုင်သွားရင်တောင် အနော်ရထာလမ်းကနေပတ်ရတာ။ အခု မဟာဗန္ဓုလလမ်းအတိုင်းသွားလာလို့ရပြီ” ဟု ရန်ကုန်မြို့နေသူတစ်ဦးက ယနေ့ခေတ်သို့ ပြောသည်။
မဟာဗန္ဓုလပန်းခြံလမ်းတွင် ရန်ကုန်တိုင်းတရားရုံးနှင့် ရန်ကုန်မြို့တော်ခန်းမတို့တည်ရှိပြီး ယခင်က သက်ဆိုင်ရာတာဝန်ရှိသူများ၏ယာဉ်မှအပ အခြားမော်တော်ယာဉ်များ ဖြတ်သန်းသွားလာခွင့်မပြုဘဲ သံဆူးကြိုးများဖြင့် ကာရံတားမြစ်ထားကြောင်း သိရသည်။
အဆိုပါ မဟာဗန္ဓုလပန်းခြံလမ်းနှင့် ချဉ်းကပ်လမ်းများအားလုံးကို လွယ်ကူစွာဖြတ်သန်းသွားလာနိုင်ရေးအတွက် သံဆူးကြိုးအကာအရံများကို ဖြတ်သိမ်းလိုက်ပြီဖြစ်ကြောင်း ရန်ကုန်မြို့တော်စည်ပင်သာယာရေးကော်မတီမှ တာဝန်ရှိသူတစ်ဦးက ယနေ့ခေတ်သို့ ပြောသည်။
မြင့်မြတ်အောင်မြင်
ဓာတ်ပုံ – မြင့်မြတ်အောင်မြင်
ယနေ့ခေတ်
ရန်ကုန်မြို့တွင် လေးနှစ်ခန့်ကြာပိတ်ထားသော မြို့တော်ခန်းမဘေးပတ်လည်လမ်းများ ပြန်လည်ဖွင့်လှစ် အတွက် မှတ်ချက်များ 0 ခုရှိပါတယ်