ရန်ကုန်၊ စက်တင်ဘာ ၂
ရန်ကုန်မြို့အတွင်းရှိ မြို့နယ်အချို့တွင် ယမန်နေ့ညက ၃.၄ အဆင့်ရှိသည့် ငလျင်လှုပ်ခတ်မှုဖြစ်ပေါ်ခဲ့ကြောင်း သိရသည်။
စက်တင်ဘာ ၁ ရက်၊ ည ၁၁ နာရီ၊ ၄ မိနစ်က ရန်ကုန်မြို့အတွင်းရှိ ဒလမြို့အပါအဝင် လှိုင်သာယာ၊ မြောက်ဥက္ကလာပ၊ မရမ်းကုန်း၊သမိုင်း၊ တောင်ဥက္ကလာ၊ ကြည့်မြင်တိုင်၊ ဗဟန်း၊ သာကေတ၊ ဒေါပုံ၊ တောင်ဒဂုံ၊ မြောက်ဒဂုံ စသည့်နေရာများတွင် ၃.၄ ပြင်းအားရှိသည့် ငလျင်လှုပ်ခဲ့မှုဖြစ်ပေါ်ခဲ့ကြောင်း သိရသည်။
“ညက မအိပ်သေးတော့ လှုပ်တာသိလိုက်ရတယ်။ တချို့မြို့နယ်တွေမှာလည်းလှုပ်တယ်။ အောက်တော့မဆင်းဖြစ်ဘူး။ စောင့်တော့ကြည့်နေရတာပေါ့။ နှစ်ကြိမ်လောက်လှုပ်ရင်တော့ အောက်ဆင်းမှာ။ ငလျင်က ဒီနှစ်ထဲမှာတင် ခဏခဏလှုပ်နေတော့ စိတ်တော့ပူရတယ်။” ဟု ကြည့်မြင်တိုင်မြို့ခံတစ်ဦးက ယနေ့ခေတ်သို့ ပြောသည်။
ထို့အပြင် ယနေ့နံနက် ၇ နာရီ၊ ၂၁ မိနစ်က မန္တလေးတိုင်းဒေသကြီး၊ မန္တလေးမြို့မှ အရှေ့တောင်ဘက်ပိုင်း ၁၄ မိုင်ခန့်အကွာရှိ ကျောက်ဆည်မြို့အနီးကို ဗဟိုပြုကာ မဂ္ဂနီကျု ၃.၈ အဆင့်ရှိသည့် မြေငလျင်ငယ်သည့် မြေအောက်အနက် ၆ မိုင်တွင် ထပ်မံလှုပ်ခဲ့ကြောင်း သိရသည်။
၂၀၂၆ ခုနှစ်၊ ဇန်နဝါရီ ၁၉ ရက်၊ ည ၁၀ နာရီ၊ ၁၃ မိနစ် ၅၇ စက္ကန့်ကလည်း၊ ရန်ကုန်မြို့အတွင်းရှိ ကြည့်မြင်တိုင်၊ တာမွေ၊ ရွှေပြည်သာ၊ မြောက်ဒဂုံ၊ သာကေတ၊ မြောက်ဥက္ကလား စသည့်မြို့နယ်များတွင် ၄.၅ အဆင့်ရှိသည့် ငလျင်လှုပ်ခတ်ခဲ့ကြောင်း သိရသည်။
ဇူလိုင် ၂၉ ရက်၊ ည ၈ နာရီ ၊ ၃၂ မိနစ်၊ ၄၅ စက္ကန့်ကလည်း၊ မန္တလေးမြို့၊ အောင်မြေသာဇံမြို့နယ်၏ အနောက်မြောက်ဘက် (၆) မိုင်ခန့်အကွာတွင် ပြင်းအား ၄.၅ ရှိသည့် ငလျင်လှုပ် ခတ်ခြင်းကြောင့် အထပ်မြင့်နေထိုင်သူများ ထိတ်လန့်ခဲ့ကြရကြောင်း သိရသည်။
#ချစ်ချစ်ခိုင်
ဓာတ်ပုံ – မြေငလျင်သတင်းစင်တာ
#ယနေ့ခေတ်
ရန်ကုန်မြို့နေရာအချို့တွင် အင်းအား ၃.၄ ရှိသည့် ငလျင်လှုပ်ခတ် အတွက် မှတ်ချက်များ 0 ခုရှိပါတယ်