ဘန်ကောက်၊ ဩဂုတ် ၃၀
စနေနေ့ညနေပိုင်းက ထိုင်းနိုင်ငံ၊ မြောင်ခရိုင်၊ ပတ္တာနီမြို့ရှိ ဆောက်လုပ်ရေးပစ္စည်းအရောင်း ဆိုင်ကြီးတစ်ခုအတွင်း လက်နက်အပြည့်အစုံကိုင်ဆောင်ထားသော သူပုန်များ၏ စနစ်တကျတိုက်ခိုက်မှုကြောင့် ပေါက်ကွဲမှုသုံးကြိမ်ဖြစ်ပွားခဲ့ပြီးနောက် လုံခြုံရေးတပ်ဖွဲ့ဝင်များက အဆိုပါဆိုင်ကြီးကို ဝိုင်းရံပိတ်ဆို့ထားခဲ့ကြသည်။ လူထိခိုက်ဒဏ်ရာရမှု တစ်စုံတစ်ရာမရှိကြောင်း သတင်းရရှိသည်။
အဆိုပါဖြစ်စဉ်သည် ညနေ ၆ နာရီ ၄၀ မိနစ်ဝန်းကျင်တွင် ဖြစ်ပွားခဲ့ခြင်းဖြစ်ပြီး၊ ဘာနားကျေးရွာအုပ်စုရှိ ဘာနားလမ်းဆုံတွင် ကျူးကျော်ဝင်ရောက်မှုတစ်ခု ဖြစ်ပွားနေကြောင်း ပတ္တနီရဲတပ်ဖွဲ့နှင့် လုံခြုံရေးဝန်ထမ်းများက သတင်းရရှိခဲ့သည်။
ကနဦးစုံစမ်းစစ်ဆေးချက်များအရ တိုက်ခိုက်ရေးရိုင်ဖယ်သေနတ်များ ကိုင်ဆောင်ထားသည့် ၃ ဦး၊ ၄ ဦးခန့်ရှိသော အဖွဲ့တစ်ဖွဲ့သည် ပစ္စည်းအမြောက်အမြား တင်ဆောင်လာသည့် ဘေးတွဲဆိုင်ကယ်တစ်စီးဖြင့် စတိုးဆိုင်၏ဂိုဒေါင်သို့ ရောက်ရှိလာခဲ့ကြသည်။
မျက်မြင်သက်သေများ၏ ပြောပြချက်အရ လက်နက်ကိုင်ဆောင်ထားသူများသည် ဆိုင်ဝန်ထမ်းများနှင့် ဈေးဝယ်သူများကို ရန်လိုသောအမူအရာဖြင့် ထိပ်တိုက်ရင်ဆိုင်ကာ ၎င်းတို့၏လက်နက်များကို ဝှေ့ယမ်းပြပြီး လူတိုင်းချက်ချင်းထွက်ခွာကြရန် အော်ဟစ်အမိန့်ပေးခဲ့ကြသည်။ ထိတ်လန့်ခြောက်ခြားနေသော အလုပ်သမားများနှင့် ဈေးဝယ်သူများသည် အဆောက်အအုံအတွင်းမှ အလုအယက်ထွက်ပြေးခဲ့ကြသည်။
အဆိုပါနေရာမှ လူအားလုံးကို မောင်းထုတ်ပြီးပြီးချင်းမှာပင် ဆိုင်အတွင်း၌ ပြင်းထန်သောပေါက်ကွဲမှု သုံးကြိမ်ဖြစ်ပွားခဲ့ပြီး ဂိုဒေါင်ပတ်ဝန်းကျင်ဧရိယာကို ပျက်စီးစေခဲ့သည်။
ထိခိုက်ဒဏ်ရာရသူ၊ သေဆုံးသူ တစ်ဦးမျှမရှိကြောင်း လုံခြုံရေးတာဝန်ရှိသူများက အတည်ပြုသည်။
ပူးတွဲလုံခြုံရေးတပ်ဖွဲ့များသည် အဆိုပါနေရာပတ်လည်တွင် တင်းကျပ်သောလုံခြုံရေးစည်းကို ချက်ချင်းချမှတ်ခဲ့သည်။
မပေါက်ကွဲသေးသော ဗုံးများအား အသက်မဲ့အောင်လုပ်ဆောင်သည့် (EOD) အဖွဲ့များကို စေ့စေ့စပ်စပ် ရှာဖွေမှုများပြုလုပ်ရန် စေလွှတ်ခဲ့ပြီး၊ အထူးသဖြင့် ပြစ်မှုကျူးလွန်သူများ စွန့်ပစ်ထားခဲ့သည့် လက်လုပ်ဗုံးအစိတ်အပိုင်းများ ထပ်မံပါရှိနေပုံရသော သံသယဖြစ်ဖွယ် ဘေးတွဲဆိုင်ကယ်ကို အဓိကအာရုံစိုက် စစ်ဆေးခဲ့ကြသည်။
အာဏာပိုင်များက ယခုကဲ့သို့ ရဲရဲတင်းတင်း လုပ်ဆောင်လာသည့် စစ်ဆင်ရေးသည် တောင်ပိုင်းနယ်စပ်ခရိုင်များတစ်လျှောက် မတည်ငြိမ်မှုများဖြစ်ပေါ်စေရန် ရည်ရွယ်ခြင်းဖြစ် သည်ဟု သံသယရှိနေကြသည်။
လုံခြုံရေးစစ်ဆေးမှုများနှင့် သက်သေအထောက်အထားများ စုဆောင်းခြင်းကို ဆက်လက်လုပ်ဆောင်နေဆဲဖြစ်သောကြောင့် ပြည်သူများအနေဖြင့် ဘာနားလမ်းဆုံနှင့် ပတ်ဝန်းကျင်ဒေသများသို့ သွားလာခြင်းမပြုရန် ရဲတပ်ဖွဲ့က သတိပေးချက် ထုတ်ပြန်ထားသည်။
Ref: world.thaipbs.or.th
ယနေ့ခေတ်
လက်နက်ကိုင်များက အရပ်သားများကို ဘေးလွတ်ရာသို့ မောင်းထုတ်ပြီးနောက် ပတ္တာနီမြို့ စတိုးဆိုင်တွင် ပေါက်ကွဲမှု သုံးကြိမ်ဖြစ်ပွား အတွက် မှတ်ချက်များ 0 ခုရှိပါတယ်