ဘန်ကောက်၊ မေ ၇
အာဆီယံခေါင်းဆောင်များသည် သောကြာနေ့တွင် အရှေ့အလယ်ပိုင်းအကျပ်အတည်းမှ ပိုမိုကျယ်ပြန့်လာသော အကျိုးဆက်များအပေါ် ပူးတွဲတုံ့ပြန်မှုတစ်ရပ်ကို စဉ်းစားကြမည်ဖြစ်ကြောင်း (၄၈) ကြိမ်မြောက် အာဆီယံထိပ်သီးအစည်းအဝေး၏ ပြောရေးဆိုခွင့်ရှိသူ ဒန်နီရယ် ဇာဗီယာ အင်ပီးရီးရယ်က ပြောကြားသည်။
အာဆီယံ၏ စုပေါင်းရပ်တည်ချက်ကို ထိပ်သီးအစည်းအဝေးတွင် ထုတ်ပြန်မည့် အဓိက အကြောင်းအရာသုံးခုအနက် တစ်ခုဖြစ်သည့် အရှေ့အလယ်ပိုင်းအကျပ်အတည်းအပေါ် တုံ့ပြန်မှုကို အာဆီယံခေါင်းဆောင်များ၏ ကြေညာချက်တွင် ထည့်သွင်းထားမည်ဟု အင်ပီးရီးရယ်က ပြောကြားသည်။
ထိပ်သီးအစည်းအဝေးမတိုင်မီ အာဆီယံနိုင်ငံခြားရေးဝန်ကြီးများသည် အရှေ့အလယ်ပိုင်းတွင် ဖြစ်ပေါ်တိုးတက်မှုများကို ဆွေးနွေးရန် အထူးအွန်လိုင်းအစည်းအဝေးနှစ်ခု ကျင်းပခဲ့သည်။
ကြေညာချက်တွင် အကျပ်အတည်းအပေါ် ညှိနှိုင်းတုံ့ပြန်မှုများကို ဖော်ပြထားပြီး စွမ်းအင်ထောက်ပံ့မှု၊ စားနပ်ရိက္ခာဖူလုံမှုနှင့် ပြည်ပရှိ အာဆီယံနိုင်ငံသားများ၏ ဘေးကင်းရေးကို ထိခိုက်စေသည့် ကိစ္စရပ်များအပါအဝင် အနာဂတ်အရေးပေါ်အခြေအနေများအတွက် ယန္တရားများကို အားကောင်းစေရန် ရည်ရွယ်သည်။
အကြောင်းအရာများသည် အာဆီယံနိုင်ငံရေး-လုံခြုံရေးအသိုက်အဝန်း ကဏ္ဍအောက်တွင်ပါဝင်ပြီး ပထဝီနိုင်ငံရေးနှင့် စီးပွားရေးဆိုင်ရာ စိန်ခေါ်မှုများ မြင့်တက်လာနေချိန်တွင် ဒေသတွင်းပူးပေါင်းဆောင်ရွက်မှုကို အားကောင်းစေရန်ရည်ရွယ်ကြောင်း ပြောရေးဆိုခွင့်ရှိသူက ဆိုသည်။
၎င်းတို့ထဲတွင် ၂၀၀၇ ခုနှစ်တွင် လက်မှတ်ရေးထိုးပြီးနောက်ပိုင်း အာဆီယံ၏ တည်ထောင်ခြင်းဆိုင်ရာ ပဋိဉာဉ်စာတမ်း၏ ပထမဆုံးပြင်ဆင်ချက်ဖြစ်သည့် အာဆီယံပဋိဉာဉ်စာတမ်းကို ပြင်ဆင်ရန် စီဘူးပရိုတိုကော ပါဝင်သည်။
အဆိုပြုထားသော ပြောင်းလဲမှုများတွင် တီမော-လက်စတေအား အာဆီယံသို့ အပြည့်အဝပေါင်းစည်းနိုင်ရေးအပါအဝင် အဖွဲ့အစည်းဆိုင်ရာ ပြုပြင်ပြောင်းလဲမှုများကို ပံ့ပိုးရန်ရည်ရွယ်သည်။ တီမောသည် အောက်တိုဘာလတွင် အာဆီယံ၏ ၁၁ ခုမြောက်အဖွဲ့ဝင်အဖြစ် ဝင်ခွင့်ရရှိခဲ့သည်။
အာဆီယံခေါင်းဆောင်များသည် ပင်လယ်ပြင်တွင် လက်တွေ့ပူးပေါင်းဆောင်ရွက်မှုကို တိုးချဲ့ရန်ရည်ရွယ်သည့် ရေကြောင်းပူးပေါင်းဆောင်ရွက်မှုဆိုင်ရာ အာဆီယံခေါင်းဆောင်များ၏ ကြေညာစာတမ်းကိုလည်း ထောက်ခံရန် မျှော်လင့်ရသည်။
ကြေညာစာတမ်းအောက်ရှိ လုပ်ဆောင်ချက်များတွင် အာဆီယံကမ်းခြေစောင့်တပ်ဖိုရမ်ကို တရားဝင်ကဏ္ဍအဖွဲ့အစည်းတစ်ခုအဖြစ် မြှင့်တင်ခြင်းနှင့် ဖိလစ်ပိုင်တွင် အာဆီယံရေကြောင်းစင်တာတစ်ခု တည်ထောင်ရန် စူးစမ်းလေ့လာခြင်းတို့ ပါဝင်သည်။
ဤထိပ်သီးအစည်းအဝေးသည် ကမ္ဘာလုံးဆိုင်ရာတင်းမာမှုများ၊ အထူးသဖြင့် စွမ်းအင်နှင့် စားနပ်ရိက္ခာဖူလုံရေးဆိုင်ရာ စိုးရိမ်မှုလှိုင်းလုံးကြီးများ၏ အကျိုး သက်ရောက်မှုများကို ရင်ဆိုင်နေရချိန်တွင် ဖြစ်ပေါ်လာခြင်းဖြစ်သည်။
ဖိလစ်ပိုင်နိုင်ငံက ဥက္ကဋ္ဌအဖြစ်တာဝန်ယူစဉ်တွင် ဒေသတွင်းအဖွဲ့ခေါင်းဆောင်များသည် စွမ်းအင်လုံခြုံရေး၊ စားနပ်ရိက္ခာဖူလုံရေးနှင့် အာဆီယံနိုင်ငံသားများ၏ ဘေးကင်းရေးကို ဦးစားပေးမည်ဟု ထပ်လောင်းပြောကြားခဲ့သည်။
အစီအစဉ်တွင် အရှေ့တောင်အာရှ ချစ်ကြည်ရင်းနှီးမှုနှင့် ပူးပေါင်းဆောင်ရွက်ရေးစာချုပ် နှစ် ၅၀ ပြည့်အထိမ်းအမှတ် လှုပ်ရှားမှုများ၊ တီမော-လက်စတီနိုင်ငံကို ပေါင်းစည်းရန် ဆက်လက်ကြိုးပမ်းမှုများနှင့် မြန်မာနိုင်ငံ၏အခြေအနေများကိုလည်း ဆွေးနွေးမည်ဖြစ်သည်။
“ကျွန်ုပ်တို့၏အနာဂတ်ကို အတူတကွလမ်းညွှန်ခြင်း” ခေါင်းစဉ်အောက်တွင် ၂၀၂၆ ခုနှစ် အာဆီယံထိပ်သီးအစည်းအဝေးနှင့် ဆက်စပ်အစည်းအဝေးများကို ဖိလစ်ပိုင်နိုင်ငံက အိမ်ရှင်အဖြစ် လက်ခံကျင်းပလျက်ရှိသည်။
Ref: world.thaipbs.or.th
ယနေ့ခေတ်
အရှေ့အလယ်ပိုင်းအကျပ်အတည်းအပေါ် အာဆီယံခေါင်းဆောင်များ၏တုံ့ပြန်မှု ပူးတွဲကြေညာချက် ထုတ်ပြန်မည် အတွက် မှတ်ချက်များ 0 ခုရှိပါတယ်